Rúmlega 10 milljarðar hefðu fengist í ríkiskassann hefði verið innheimt komugjald af flugfarþegum til landsins á árunum 2015-2016. Þessi upphæð hefði fengist værir miðað við 1500 króna komugjald og miðað væri við áætlaðan fjölda flugfarþega til landsins samkvæmt spám Isavia. Þetta kom fram í svari Benedikts Jóhannessonar, fjármála- og efnahagsráðherra, við fyrirspurn frá Oddnýju G. Harðardóttur, þingmanni Samfylkingarinnar.
Fram kom að um fjórðungur hefði lent á íslenskum farþegum og frá þeim runnið 2,3 milljarðar.
Benedikt sagði þó að takmarkanir væru á því að innleiða komugjöld og einnig hvort það yrði þá bæði að leggja þau á millilanda- og innanlandsflug. Þjóðréttarsamningar takmarka slíka innleiðingu, aðallega EES samningurinn og alþjóðaflugsáttmálann (e. Convention on International Civil Aviation), hins svonefnda Chicago-sáttmála sem gekk í gildi hér á landi 20. apríl 1947.
Fram kom meðal annars í svari fjármálaráðherra að það skiptir máli hvort um yrði að ræða skattlagningu eða þjónustugjald sem standa ætti undir veittri þjónustu hverju sinni. Þá skipti einnig máli hvort fyrirkomulagið yrði með þeim hætti að komugjöld væru innheimt í gegnum farseðla eða með öðrum hætti af farþegum.
