Saksóknari krefst þungra dóma í svokölluðu Stím-máli yfir þeim þremur sem ákærðir eru.
Hann vill að Lárus Welding, fyrrverandi bankastjóri Glitnis banka, fái fangelsi ekki skemur en fimm ár.
Jóhannes Baldursson, fyrrverandi framkvæmdastjóri markaðsviðskipta bankans, fái fangelsi ekki skemur en þrjú ár.
Þorvaldur Lúðvík Sigurjónsson, fyrrverandi bankastjóri Saga Capital, fari í fangelsi í ekki skemmri tíma en 18 mánuði.
Í frétt mbl.is um þetta mál segir að Lárus sé ákærður fyrir umboðssvik með því að hafa farið út fyrir heimildir sínar til lánveitinga hjá Glitni banka þegar hann beitti sér fyrir því að félaginu FS36, sem síðar varð Stim, fengi um 20 milljarða króna lán frá bankanum með veði í öllu hlutafé félagsins og bréfum í FL Group sem lánsféð var notað til að kaupa. Lánsféð var einnig notað til að kaupa bréf í Glitni.
Jóhannes sé ákærður fyrir umboðssvik fyrir að hafa beitt sér fyrir því að fjárfestingasjóðurinn GLB FX, í eigu Glitnis banka, keypti framvirkt skuldabréf í Stím af Saga Capital.
Þorvaldur Lúðvík sé ákærður fyrir hlutdeild í umboðssvikum með því að hafa hvatt til þeirra viðskipta og liðsinnt Jóhannesi í þeim. Markmiðið með viðskiptunum hafi verið að tryggja að Saga Capital fengi kröfu sína að fullu bætta. Þorvaldur Lúðvík hefði ennfremur haft persónulegra hagsmuna að gæta en hann hefði átt 12% hlut í Saga Capital.
