Þorsteinn Pálsson segir í nýjum pistli sínum á hringbraut.is að vaxtahækkun Seðlabankans varpi ljósi á þrískiptingu peningahagkerfisins. Almenningur blæði, en sjávarútvegur, stóriðja og ferðaþjónusta njóti þess að hafa annan gjaldeyri.
\"Vaxtahækkunin hefur bein áhrif á þá sem nota íslensku krónuna. Það gera launamenn og minni og meðalstór fyrirtæki. Hækkunin hefur aftur á móti minni áhrif á verðtryggðu krónuna sem stjórnast af verðbólgunni. Hún er ríkjandi á húsnæðismarkaðnum. En áhrifin eru óveruleg á þá sem gera upp í erlendum gjaldeyri. Það er sjávarútvegurinn, stóriðjan og ferðamannaiðnaðurinn.\"
Hann segir að vart geti þetta kerfi kallast sanngjarnt: \"Vaxtahækkunin dregur þannig vel fram það óréttlæti sem felst í þessari skiptingu peningahagkerfisins. Útflutningsgreinarnar halda áfram að taka lán í erlendri mynt á lágum vöxtum meðan almenningur og minni fyrirtæki bera bagga vaxtahækkana. Ofan á þessa mismunun bætist svo að útflutningsgreinarnar draga til sín peninga frá almenningi þegar að því kemur að gengið fellur.\"
Hann skilur ekki sofandahátt þeirra sem helst ættu að vaka: \"Í raun er óskiljanlegt að verkalýðshreyfingin skuli ekki hafa farið fram á að launafólk fái greidd laun í sömu mynt og fyrirtækin nota sjálf í eigin reikningshaldi. Það er bæði einföld og sanngjörn krafa þó að hún leysi ekki allan vandann.\"
