Þrír eru látnir og tveir voru fluttir alvarlega slasaðir með þyrlu Landhelgisgæslunnar á Landspítalann í Fossvogi eftir að flugvél skall til jarðar við Múlakot í Fljótshlíð á níunda tímanum í gærkvöld.
Í tilkynningu frá lögreglunni á Suðurlandi kemur fram að líðan þeirra slösuðu er stöðug.
Tilkynnt var um flugslys nálægt flugvellinum við Múlakot í Fljótshlíð um 20.30 í gærkvöld. Eldur var þá laus í flugvélinni. Fjölmennt lið lögreglu, slökkviliðs og sjúkraflutninga HSU, ásamt tveimur þyrlum Landhelgisgæslunnar fóru á staðinn.
Rannsóknardeild Lögreglustjórans á Suðurlandi fer með rannsókn málsins og nýtur aðstoðar Rannsóknarnefndar samgönguslysa og tæknideildar Lögreglunnar á Höfuðborgarsvæðinu.
Viðbragðsteymi Rauða krossins var sent á vettvang til að veita vitnum sálrænan stuðning.
