Alls eru 498 á biðlista eftir stuðningsþjónustu í Reykjavík eða 37 fleiri en á síðasta ári. Þá voru ríflega 1.100 sem fengu þjónustuna og því stórt hlutfall þeirra sem þurfa á þjónustunni að halda á biðlista.
Fréttablaðið fjallar um þennan biðlsita í dag og vitnar í ráðgjafa á þjónustumiðstöðvum borgarinnar sem segja að stærstur hluti biðlistanna sé til kominn vegna skorts á fjármagni, en það kostar um það bil 280 milljónir króna að koma til móts við þjónustuþarfir þeirra sem á listanum eru. Einnig segja ráðgjafar erfitt að ráða starfsmenn til að sinna þjónustunni, sérstaklega sérhæft starfsfólk þar sem launin eru ekki samkeppnishæf hjá borginni. Þetta kemur fram á minnisblaði frá velferðarsviði Reykjavíkurborgar sem kynnt var á fundi velferðarráðs í vikunni.
Stuðningsþjónustan hefur meðal annars það markmið að koma í veg fyrir félagslega einangrun og bæta samskiptahæfni. Þannig hefur þjónustan forvarnargildi: \"Það er samdóma álit þeirra sem starfa við stuðningsþjónustu að þeir sem ekki fá þjónustu í samræmi við þarfir geti frekar þróað með sér auknar þjónustuþarfir eða vandamál síðar,“ segir í minnisblaði velferðarsviðs.
Á fundi velferðarráðs lagði Sjálfstæðisflokkurinn einnig til að stuðningsþjónusta yrði boðin út: \"Ef borgin getur ekki staðið undir þessum þörfum verðum við að fá einkaaðila í lið með okkur,“ segir Áslaug. „Að sjálfsögðu þurfa slíkir aðilar að uppfylla sömu gæða- og hæfniskröfur og gerðar eru til þjónustunnar hjá Reykjavíkurborg. En getuleysi borgarinnar á ekki að bitna á notendunum.“
