Uppbygging svokallaðs Þjóðarsjóðs er óþörf að mati Þorsteins Víglundssonar, þingmanns Viðreisnar. Þetta kemur fram í nefndaráliti annars minnihluta efnahags- og viðskiptanefndar, sem Þorsteinn er í forsvari fyrir, vegna frumvarps Bjarna Benediktssonar fjármála- og efnahagsráðherra um Þjóðarsjóð. Fréttablaðið greinir frá.
Í álitinu segir hann að um sé að ræða tekjur af sjálfbærum auðlindum, orkunni, en ekki ósjálfbærum eins og í tilfellum annarra þjóðarsjóða. Nefnir Þorsteinn í því samhengi olíusjóðinn norska. Því telur hann að tekjustreymi vegna auðlindanna taki ekki enda í fyrirsjáanlegri framtíð.
Auk þess segir hann lífeyriskerfi landsmanna þegar fjármagnað með sjóðsöfnun. Lífeyriskerfið hérlendis sé með því öflugasta á alþjóðavísu enda nemi eignir lífeyrissjóðanna tæplega tvöfaldri landsframleiðslu. Nefnir Þorsteinn að það sé eitt hæsta hlutfall í heimi.
Einnig sé gjaldeyrisvaraforði Seðlabanka Íslands öflugur. Uppbygging forðans hafi farið fram hér á landi og ávöxtun hans verið góð. Því telur Þorsteinn ekki þörf á að byggja upp þjóðarsjóð til að styrkja gjaldeyrisvaraforðann frekar.
Þá bendir hann á að lög um opinber fjármál eigi að tryggja að stjórn ríkisfjármála sé ávallt með þeim hætti að ríkissjóður sé fær um að takast á við tímabundin áföll. Þorsteinn segir það hagkvæmara að láta viðbótartekjur greiða niður ófjármagnaðar lífeyrisskuldbindingar, en þær nema rúmum 600 milljörðum króna að svo stöddu.
