„Andstaðan við Þriðja orkupakkann er í raun andstaða við EES samninginn. Með afstöðu sinni hefur Miðflokkurinn tekið afstöðu gegn samningi sem skilað hefur íslensku þjóðinni mesta lífskjarabata undanfarins aldarfjórðungs.“
DV fjallar um málið og vitnar í grein í Kjarnanum eftir Þorstein Víglinundsson, þingmann Viðreisnar.
Þorsteinn sakar íhaldsmenn innan Sjálfstæðisflokksins sem og Miðflokksmenn vera á miðum þjóðrembunnar í umræðu um þriðja orkupakkann. Þá heldur Þorsteinn fram að vaxandi ójöfnuður og óánægja vegna hans sé orsök uppgangs þjóðernisafla. Einnig hafi Íslendingar notið góðs af auknum alþjóðaviðskiptum og efnahagslíf hér á landi hafi tekið stakkaskiptum með EES-samningnum, en það er einmitt gegn slíku samstarfi sem þjóðernissinnar hamast oft. Þorsteinn segir:
„Þessi orðræða minnir óneitanlega á umræðuna innan breska Íhaldsflokksins, sem á endanum leiddi til þjóðaratkvæðagreiðslunnar um Brexit. Segja má að leiðtogar flokksins hafi hrakist til þeirrar afleitu stöðu sem Bretland er nú í, vegna kjarkleysis í baráttunni við þjóðernispoppúlisma og Evrópuandúð innan flokksins. Hið sama má ekki henda hér á landi.
Ekki má heldur gleyma voveiflegum afleiðingum síðasta uppgangstímabils þjóðernisrembings/fasisma í Evrópu. Það væri kannski rétt að Miðflokksmenn og íhaldsmenn innan Sjálfstæðisflokksins litu vandlega í spegil og rifjuðu aðeins upp sögukunnáttu sína áður en þeir væna aðra þingmenn um að vinna gegn þjóðarhag.“
Þorsteinn bætir við að hugmyndafræði þjóðrembunnar bjóði ekki upp á neinar lausnir heldur ali á ótta og tortryggni.
Nánar er fjallað um grein Þorsteins á vef DV.
