Stjörnufræðingurinn Þorsteinn Sæmundsson furðar sig á því hversu mikið gjald fyrir bifreiðaskoðun hefur hækkað undanfarin ár. Í grein sem hann skrifar í Morgunblaðið í dag segir hann að nýverið hafi hann farið með sinn bíl og bíl konunnar sinnar í skoðun, fékk hann reikning upp á 13.890 krónur.
Í seinna skiptið tók hann tímann, sem reyndist 9 mínútur. „Það merkir að klukkutímagjaldið er hátt í 60 þúsund krónur. Nú er það mín reynsla og annarra sem ég hef spurt, að klukkutímagjald á bifreiðaverkstæði sé varla meira en 20 þúsund. Gjaldið fyrir skoðun er því þrisvar sinnum hærra,“ segir Þorsteinn.
„Árið 1989 var gjaldið kr. 1.900. Árið 1995 var það kr. 2.910. Gjaldið nú er 13.890 eins og fyrr er sagt. Hækkunin frá 1989 til 1995 samsvaraði nokkurn veginn hækkun framfærsluvísitölunnar á þessum árum. Hækkunin eftir 1995 er hins vegar tvöfalt meiri en hækkun vísitölunnar. Þetta vekur þá spurningu hvað hafi breyst eftir 1995. Því er auðsvarað. Árið 1997 var skoðunin færð frá ríkinu til einkaaðila. Sú breyting hefur orðið bifreiðaeigendum dýrkeypt. Hafi menn vonast til þess að samkeppni þrýsti verðinu niður hefur sú von ekki ræst.“
Grein Þorsteins hefur vakið mikla athygli, meðal þeirra sem tjá sig um málið er Pawel Bartoszek, borgarfulltrúi Viðreisnar sem segir á Facebook:
„Ég veit það ekki. Ég versla við einn skoðunaraðila nálægt mér. Tékkland. Finnst þeir með faglega þjónustu og hlýlegt og þægilegt viðmót. Það er ekki sjálfgefið að þjónusta við bifreiðaeigendur eigi að vera álitin grunnþjónusta sem skattgreiðendur hlaupi undir bagga með ef hún fer að skila halla. Betra svona.“
