Aðgerðasinninn og meðlimur Öfga, Þórhildur Gyða Arnarsdóttir, segist í Twitter-færslu vera í veikindaleyfi frá vinnu „vegna andlegrar og líkamlegrar bugunar vegna stöðugs álags sem ég hef verið undir síðastliðnar vikur.“
Þórhildur Gyða hefur staðið í ströngu undanfarna mánuði en í lok sumars steig hún fram og sagði frá meintu ofbeldi sem hún mátti þola af hendi landsliðsmannsins Kolbeins Sigþórssonar. Þá kærði Þórhildur nýlega hæstaréttarlögmanninn Sigurð G. Guðjónsson fyrir að hafa birt myndir úr lögregluskýrslu hennar.
Það er greinilegt að undanfarnir mánuðir hafa tekið á Þórhildi og viðurkennir hún á Twitter að hún hefði hæglega getað endað í kulnun ef hún hefði haldið áfram.
„Ef ég hefði harkað þetta af mér eru miklar líkur að ég hefði endað í kulnun fyrir 26 ára aldur. Í staðinn verð ég orkumeiri með hverjum deginum.“
Ég er í veikindaleyfi frá vinnu vegna andlegrar og líkamlegrar bugunar vegna stöðugs álags sem ég hef verið undir síðastliðnar vikur. Ef ég hefði harkað þetta af mér eru miklar líkur að ég hefði endað í kulnun fyrir 26 ára aldur. Í staðinn verð ég orkumeiri með hverjum deginum. https://t.co/R4GH4vkWFm
— Þórhildur Gyða (@torii_96) November 13, 2021
Í tísti sínu vitnar Þórhildur í gríðarvinsælt tíst sem áhrifavaldurinn og hlaðvarpsstjórnandinn Edda Falak birti á Twitter í gær þar sem hún hvatti fólk til að nýta veikindadaga sína.
Tíst Eddu hefur vakið gífurleg viðbrögð og ekki öll af jákvæðum nótum en margir vilja meina að með þessu sé hún einfaldlega að ýta undir aumingjavæðingu.
Fjölmargir virðast þó vera sammála Eddu og verður því eflaust spennandi að sjá hversu mörg afföll verða á vinnustöðum landsins komandi mánudag, eins og Edda ýjar sjálf að í öðru tísti.
Jæja núna fara allir að hringja sig inn veikan og öll fyrirtæki fara á hausinn - að vera áhrifavaldur er eins og að vera guð
— Edda Falak (@eddafalak) November 13, 2021
