Baráttukonan Þórdís Elva Þorvaldsdóttir tjáir sig um hið alræmda „kyrkingarmál“, sem hefur tröllriðið samfélaginu undanfarið, í færslu á Facebook.
Hanna Björg Vilhjálmsdóttir og Sigga Dögg tókust á um kynfræðslu í grunnskólum í Kastljósi í síðustu viku. Fréttablaðið fjallaði um málið en þar ræddu þær meðal annars kyrkingar sem Hanna Björg vildi meina að Sigga Dögg væri að kenna grunnskólabörnum. Margir hafa tjáð sig um málið og virðist sem íslenskir femínistar hafi skipst í tvær fylkingar með og á móti BDSM og kyrkingum.
Þórdís Elva birti eins konar spurt og svarað á Facebook þar sem hún fer yfir hinar ýmsu hliðar þessa þrætueplis.
„Eru til dæmi um að gerendur með illan ásetning hafi notað "kyrkingarblæti" og "BDSM" sem afsökun fyrir að beita (jafnvel banvænu) ofbeldi? -Já,“ skrifar Þórdís.
„Eru til dæmi um fólk sem hneigist að BDSM, og iðkar það sér og sínum til ánægju og yndisauka, með þeim afleiðingum að það eykur ást og traust í samböndum þeirra? -Já.“
Þá segir Þórdís að vissulega mætti kynfræðsla og kynjafræðikennsla í skólum vera meiri en áréttar að börn og unglingar verðskuldi að fullorðnir séu vökulir og gagnrýnir gagnvart slíkri kennslu.
„Má efast um þá röksemdafærslu að "unglingar sjá þetta hvort eð er á netinu og þá er betra að kenna þeim að framkvæma það?" Já, um þá röksemdafærslu má efast því "incest", "gangrape", "revenge porn", "ass to mouth" og "rosebud" eru líka undirflokkar á mainstream klámveitum, en það væri beinlínis ólöglegt/alvarlega heilsuspillandi að kenna krökkum að framkvæma það.“
Að lokum segir Þórdís að konur sem skilgreina sig sem femínista þurfi vissulega ekki alltaf að vera sammála.
„Mega konur, líka þær sem kenna sig við femínisma, vera ósammála, takast á, gagnrýna mismunandi aðferðafræði, vera óþægilegar, ögra viðteknum gildum, gera mistök, lýsa iðrun, skipta um skoðun og gera það allt fyrir opnum tjöldum, svo við sem samfélag getum þroskast og lært? -Já. Og mikið óskaplega erum við heppin að þær séu til.“
