Þórarinn Hjartarson þáttastjórnandi hlaðvarpsins Ein pæling kemur Sigurði Inga Jóhannssonar innviðaráðherra til varnar eftir ummælin sem hann lét falla um Vigdísi Häsler á Búnaðarþingi.
„Það er fagnaðarefni ef Sigurður Ingi er sá rasisti sem við þurfum að hafa áhyggjur af. Ég tel að Sigurður Ingi hygli ekki hvítum Íslendingum á kostnað þeldökkra. Hann er vissulega karl síns tíma. Nýleg ummæli hans eru ekki til eftirbreytni og hann veit það. Viðbrögðin, hins vegar, sýna á hversu slæmum stað flokkarnir í stjórnarandstöðu eru,“ skrifar Þórarinn í nýjum pistli á Vísir.is
„Það er fórnarkostnaður fólginn í því að beina athygli kjósenda að tilteknu málefni. Stjórnarandstaðan sá sér leik á borði og keppist við að beina athygli að því hvað þau séu góð og hvað Sigurður er ómögulegur. Athyglin fór frá því að krefjast þess að fá að vita af hverju ákveðnir aðilar fengu símtal um tilboðsverð á eignum ríkisins, frá því að hinir ríku hafi fengið skattaafslátt af séreignarsparnaði til fasteignakaupa í áraraðir og frá því að Íslendingar munu þurfa að takast á við gríðarlegar verðhækkanir á næstu mánuðum vegna innrásarinnar í Úkraínu,“ bætir Þórarinn við.
Stjórnarandstöðuþingmenn voru í miklum ham á Alþingi í dag og krafðist Halldóra Mogensen þingmaður Pírata að forseti alþingis myndi stöðva þingstörf svo Sigurður Ingi myndi gefa munnlega skýrslu og skýra ummæli sín fyrir þinginu samkvæmt 61.gr þingskaparlaga.
„Það er sjálfskaparvíti stjórnarandstöðunnar að hlusta á móðguðustu manneskjuna á Twitter. Afleiðingarnar eru þær að ríkisstjórnarflokkarnir búa við óhugnanlega auðvelt aðgengi að atkvæðum kjósenda og komast upp með pólitíska leti sem á sér fá dæmi utan Íslands,“ heldur Þórarinn hins vega áfram.
„Sigurður Ingi skeit upp á bak með þessum ummælum. Hann baðst afsökunar. Hann er miðaldra maður og hefur líklega sagt eitthvað töluvert verra en þetta á sinni lífsleið. Okkar siðferðisþröskuldur hefur tekið hröðum breytingum undanfarna áratugi. Þessar breytingar hafa að mestu verið til hins betra,“ skrifar Þórarinn enn fremur og bætir við að krafan um Sigurður Ingi segi af sér kemur frá fólki sem hefur aldrei og muni líklegast aldrei kjósa Framsókn.
„Það er rétt að stjórnmálamenning hér á landi sé daprari en víða annars staðar. Það er mögulega rétt að Sigurður Ingi hefði þurft að segja af sér ef hann væri ráðherra annars staðar á Norðurlöndunum. En væri það betra? Það er hægt að færa rök fyrir því. Ég tel hins vegar að krafa flestra kjósenda á Íslandi sé að ráðherrar séu starfi sínu vaxnir frekar en að þeir hafi aldrei og munu aldrei gera mistök,“ skrifar Þórarinn að lokum.
