Á morgun hefst ferðalag Þjóðleikhússins út á land þar sem börnum verður boðið að njóta hinnar feykivinsælu Sögustundar.
Þjóðleikhúsið hefur undanfarin sjö ár boðið börnum í elstu deildum leikskóla á höfuðborgarsvæðinu árlega í leikhúsið, til að njóta leiksýninga sem nefnast Sögustund. Nú er röðin komin að landsbyggðunum.
Í frétt frá Þjóðleikhúsinu segir að Þjóðleikhúsið sé leikhús allra landsmanna og þess vegna hafi verið ákveðið að fara með Sögustundina í leikferð og gefa börnum á landsbyggðunum tækifæri á að kynnast töfraheimi leikhússins. Í sýningunni kemur fram brúðugerðarmeistarinn Bernd Ogrodnik ásamt brúðum sínum en umsjón hefur Þórhallur Sigurðsson leikstjóri.
Leikferðin hefst með heimsókn til Vestmannaeyja á morgun, 20. október þar sem tekið verður á móti börnum í leikhúsi bæjarins. Í kjölfarið verða aðrir landshlutar heimsóttir.
Sýnt verður á þessum stöðum:
Vestmannaeyjum, 20. október í Leikhúsinu
Ísafirði, 22. október í Edinborgarhúsinu
Selfossi, 23. október í Litla leikhúsinu
Egilsstöðum, 27. október í Valaskjálf
Akureyri, 30. október í Hofi
