Ef til vill er rithöfundurinn og Hringbrautarpenninn Guðmundur S. Brynjólfsson af Eyrarbakka ekki eini Íslendingurinn sem er ruglaður eftir þessa sjöttu viku ársins, en púslin sem safnast hafa upp í huga hans passa ekki endilega saman.
Þetta byrjar svona hjá Guðmundi í hans nýjasta pistli, þó í spurnartóni: \"Jón Þór pírati fékk ekki pizzusneið á Alþingi og gjörðist stöðumælavörður og því kallaði Árni Páll herinn aftur til baka? Eða ... Pizzusneið Samfylkingarinnar hrökk ofan í hana á miðju síðasta kjörtímabili og því fór sem fór?\"
Hann er samt efins um þessa viku: \"Herinn sá að Jón Þór pírati var kominn í úniform og varð hræddur og ákvað að koma aftur? Eða ... Ragnheiður Elín sá að Baldur Guðlaugsson átti ekki fyrir pizzusneið og ákvað því að redda honum einhverju að gera – hann gat ekki hugsað sér að verða stöðumælavörður?\"
Enn er Guðmundur hugsi um síðusu og verstu daga: \"Steinþór Pálsson sem gaf Borgun í þeirri von að fá pizzusneið óttast að herinn eigi að ýta honum út úr bankanum og inn í Samfylkinguna? Eða ... Ragnheiður Elín drakk mengað vatn úr terpentínuflösku* á Hótel AdaM og fékk óráð og sýndist Baldur Guðlaugsson vera í lagi og Árni Páll vera í stöðumælavörslu með pizzusneið?\"
Hann nálgast þó niðurstöðuna: \"Borgun fyrir pizzusneið kemur ekki til greina – en Borgun fyrir ekki neitt er í lagi?\"
Og veit enn ekki betur en vikan hafi verið svona, hafi þetta verið vika: \"Eins og glöggir menn sjá og óglöggir líka er eitthvað örlítið að; Bílastæðasjóður hefur náð sér í sjóræningja, Ragnheiður Elín hefur náð sér í ræningja, túristar hafa kynnst íslenskum ræningja, þjóðin á von á alræmdum landræningjum, Landsbankinn er rændur um miðjan dag, valdaránið í Samfylkingunni stendur yfir.\"
