Ný skýrsla Rauða krossins um fátækt og sér í lagi um Fellin í Breiðholti kemur ekki á óvart. Fyrir tæplega fjörtíu árum síðan voru börn sem bjuggu í “bökkunum” hrædd við Efra Breiðholtið. Við sem börn á Leirubakkanum vissum ekkert um að Fellablokkirnar væru fyrir verr sett fólk. Sáum þær bara útum bílrúðu og fannst þær ljótar og ógnvænlegar þegar við horfðum upp á þær.
Félagsíbúðir voru þó víst líka fyrir fjölskyldur í “bökkunum”. Við heyrðum bara ekkert af því og lékum okkur bara saman krakkarnir. Fyrir barnsaugað í neðra Breiholti fyrir tæpum fjörtíu árum var óralangt yfir móana og mýrarnar frá Leirubakkanum og upp yfir í Fellin. Við horfðum óttaslegin uppeftir á stóru, gráu blokkirnar í Asparfellinu. Líklega horfa sum börnin í dag óttaslegin niðureftir.
