Sjö árum eftir bankahrunið á Íslandi eiga endurreistir viðskiptabankar hér á landi ennþá stóra hluti í 20 fyrirtækjum í óskyldum rekstri, en samkvæmt lögum er bönkunum aðeins heimilt að stunda aðra starfsemi tímabundið.
Þetta kemur fram í Morgunblaðinu í gær þar sem birtur er listi yfir öll þewssi fyrirtæki sem eru undir verndarvæng Arion banka, Landsbankans og Íslandsbanka, en vel að merkja, eignarhald bankanna í þessum fyrirtækjum gefur verið gagbrýnt mjög af stjórnendum fyrirtækja úti á markaðnum sem telja það skekkja samkeppnisstöðu í landinu. Það er enda í höndum Fjármálaeftirlitsins að veita tímabundna tólf mánaða undanþáguheimild fyrir þess eignarhaldi, en hún virðist í mörgum tilvikum hafa verið framlengd mörgum sinnum. En lítum á listann.
Fyrirtæki í eigu Arion banka:
Landey ehf. (nýbyggingar/lóðir) 100%
BG12 slhf. (Bakkavör Group Ltd.) 62%
Farice (Tveir sæstrengir) 39,3%
Síminn hf. 38,3%
Klakki ehf. (Lýsing/Bakkavör) 31,8%
EAB1 ehf. (Refresco Gerber) 30%
Stoðir hf. (Refresco Gerber) 16,3%
SV IV slhf. (Skeljungur/PF Magn) 12,91%
Fyrirtæki í eigu Landsbankans:
Iceland Construction hf. (áður Ístak) 100%
Fasteignafélagið Borg ehf. 31,25%
Hesthólar ehf. (fasteignafélag) 26,4%
Eyrir Invest hf. (fjárfestingafélag) 23,3%
Sláturfélag Suðurlands svf. 20,76%
Stoðir hf. (fjárfestingafélag) 13,4%
Fyrirtæki í eigu Íslandsbanka:
Manstron Properties Ltd. (fasteign í Bretlandi) 100%
Geysir General Partner ehf. 100%
Geysir Green Investment Fund slhf. 100%
Fergin (Frumherji) 80%
Frumtak GP ehf (rekstraraðili Frumtaks) 19%
Nýr Norðurturn (Norðurturn í Kópavogi) 11,85%
Í umfjöllun Morgunblaðsins er rætt við Daða Kristjánsson, framkvæmdastjóra H.F. Verðbréfa. Hann segir að það sé í raun óþolandi hversu lítið sé ýtt á að bankarnir losi sig við eignir sem eru í óskyldum rekstri: \"Þeir hafa verið á undanþágu í mörg ár. Það er eins og menn séu að nýta sér þetta til hins ýtrasta,“ segir hann. Hann segir einnig það ekki vera hlutverk banka að liggja á stórum eignarhlutum í félögum að ástæðulausu. „Í mínum huga virðist sem hagsmunirnir snúist helst um að búa til þóknanatekjur hjá bönkunum. Þeir hafa fengið mörg góð tilboð í þessa hluti sem hafa ekki verið samþykkt. það lítur því út fyrir að þeir hafi verið að bíða eftir tækifærinu til að skrá sjálfir hlutina á markað.“ Þetta myndi ábyggilega ekki leyfast í nágrannalöndum, segir Daði.
