„Þessi greining er áhyggjuefni og rímar við varnaðaorð okkar undanfarið. Mikilvægasta verkefnið er að bæta hag leigjenda og einstæðra foreldra,“ segir Árni Páll Árnason, formaður Samfylkingarinnar og oddamaður minnihlutans á Alþingi í svari við fyrirspurn Hringbrautar.
Fyrr í dag var kynnt skýrsla UNICEF með sláandi niðurstöðum um skort hjá íslenskum börnum.
Þar kemur fram að rúmlega 6.100 börn á aldrinum 1-15 ára líði efnislegan skort hér á landi. Þar af líði tæplega 1.600 börn verulegan skort og hafi þeim fjölgað verulega.
„Eins og við þreytumst ekki á að segja: Það þarf betri barnabætur, húsaleigubætur og fæðingarorlof! Stuðningur hins opinbera við barnafjölskyldur hér á landi stenst engan veginn samjöfnuð við það sem gerist í grannlöndunum og það er einn stærsti áhrifaþátturinn í brottflutningi barnafólks frá landinu. Sérstakt gleðiefni er þó að sjá að börn foreldra af erlendum uppruna eru ólíklegri til að líða skort en önnur,“ segir Árni Páll Árnason, formaður Samfylkingarinnar í samtali við Hringbraut.
