Magnús Geir Þórðarson útvarpsstjóri telur breytt neyslumynstur á fjölmiðlum og stóraukið aðgengi að afþreyingu kalla á endurmat hjá RÚV: \"Ég lít svo á að á slíkum tímum sé hlutverk Ríkisútvarpsins síst minna en áður en þá þarf að skerpa á hlutverki þjónustunnar og sérstöðu,“ segir Magnús Geir.
Þetta kemur fram í viðtali sem mbl.is birtir við útvarpsstjóra í tilefni af skýrslu nefndar um starfsemi og rekstur RÚV frá 2007, en hún leit dagsins ljós í síðustu viku. Kom þar meðal annars fram að skuldir RÚV nálgast sjö milljarða króna.
Magnús Geir bregst við skýrslunni í frétt vefjarins með þessum orðum: \"Það eru gríðarlegar breytingar í aðgengi að dagskrárefni þessi misserin. Aðgangur að erlendum efnisveitum hefur stóraukist og sjálfstæðir miðlar á markaði bjóða upp á gott úrval af erlendu afþreyingarefni. Ég lít svo á að á slíkum tímum sé hlutverk Ríkisútvarpsins síst minna en áður en þá þarf að skerpa á hlutverki þjónustunnar og sérstöðu. Við höfum verið að auka áherslu á innlent efni, menningarefni og höfum stóraukið þjónustu við börn en þar eru skyldur okkar mestar. Þannig getum við tryggt að íslensk þjóð hafi aðgang að framúrskararandi íslensku efni, sögum úr okkar nærumhverfi. Við, sem menningarlega sinnuð þjóð, þurfum á öflugu Ríkisútvarpi að halda. Þó starfsemi RÚV snúist fyrst og fremst um innihald og sögurnar sem við segjum, þá þurfum við auðvitað að tryggja að almenningur geti nálgast þetta efni þar sem kallað er eftir því á hverjum tíma.“
Spurður hvernig RÚV hyggist bregðast við \"íþyngjandi\" og \"dýrkeyptum\" samningi við Vodafone frá 2013, svarar Magnús á þennan veg: \"Þessi samningur var gerður eftir útboð á Evrópska efnahagssvæðinu á sínum tíma. Þarna er verið að benda á að dreifingarkostnaður sé hár en hún var sú leið sem valin var á þeim tíma og byggðist á kröfum um sjónvarpsdreifingu sem nær til alls landsins en þetta er sama tækni og er notuð af öllum almannaþjónustumiðlum í Evrópu. Dreifikerfi sem ná eiga til nær allra landsmanna í strjálbýlu landi eiga það sameiginlegt að uppbygging þeirra er kostnaðarsöm. Það er hins vegar sjálfsagt að draga lærdóm af ákvörðunum um stórar fjárfestingar eins og þessa og ég skil skýrsluhöfunda þannig. Þeir leggja ekki til endurskoðun í sinni samantekt.“
Magnús Geir tók við sem útvarpsstjóri árið 2014 af Páli Magnússyni og segir nýja stjórn RÚV hafa skorið niður í yfirbyggingu fyrirtækisins: \"Það má eiginlega segja að þessi samantekt um fortíðina sé svarthvít. Hún er svört að því leyti að hún staðfestir það sem við höfum sagt um fortíðarvandann og skuldabaggann. Hún er hvít að því leyti að hún sýnir að lyft hefur verið grettistaki í að snúa rekstrinum við. Í skýrslunni kemur fram að á tímabilinu hafa rekstrargjöld RÚV lækkað um 11%. Fyrri stjórnendur gerðu vel í því að verja þjónustuna og öfluga dagskrá þrátt fyrir erfiðar aðstæður. Við sem tókum við 2014 höfum svo enn frekar skorið niður yfirbyggingu fyrirtækisins og náð að efla dagskrána á sama tíma. Jafnvægi er komið á í rekstrinum sem er orðinn hallalaus.\"
