Fátt virðist geta komið í veg fyrir verkföll tugþúsunda landsmanna á næstu dögum enda talast deilendur í kjaraviðræðum fjölmennustu stéttarfélaganna og viðsemjendur þeirra ekki við - og hafa ekki hugsað sér það næstu daga.
Magnús Pétursson ríkissáttasemjari sagði í fréttum í gær að menn við hans borð hefðu vart séð það svartara um áratugaskeið; ástæðuna mætti ef til rekja til þeirra átaka sem einkenndu þjóðfélagslagsumræðuna um auðlindamál og misskiptingu í samfélaginu.
Forkólfar verkalýðsfélaganna segja að ekki taki því að halda áfram viðræðum nema viðsemjendur leggi til hliðar hugmyndir sínar um breyttan vinnutíma, en í sumum tilvikum, svo sem hjá verslunarfólki, tapi það á tilboði atvinnurekenda. Þá þurfi að skoða launaþáttinn alveg upp á nýtt.
Ólafía B. Rafnsdóttir formaður VR metur það svo í samtali við Morgunblaðið i morgun að láti atvinnurekendur af kröfum sínum um breytta skilgreiningu á vinnutíma og launum "sé vel hægt að ná samningum."
Aðrir verkalýðsforkólfar segja margra daga vinnu fram undan við samningagerð, svo fremi viðsemjendur sjái einhvern flöt á því að setjast niður.
Eftir helgina hefst ný lota verkfalla sem gæti náð hámarki með allsherkjarverkfallsboðun 6. júní.
