Tekjur tekjuhæstu Íslendinganna jukust mest allra á síðasta ári. Ráðstöfunartekjur þessa hóps jukust um 11,6% á milli ára en annarra tekjuhópa minna, eða um 5 til 6%, ef undan er skilinn allra lægsti tekjuhópurinn.
Þórólfur Matthíasson, prófessor í hagfræði við Háskóla Íslands telur í samtali við Markaðinn í dag að þróunin þurfi ekki að koma á óvart. Hinir tekjuhæstu, sérstaklega atvinnurekendur, hagnist oft hraðar en aðrir í uppsveiflu: \"Þeir fá tekjurnar af fyrirtækinu þegar búið er að borga öllum öðrum og þegar hagsveiflan fer að fara upp á við þá er það rekstrarafgangurinn sem eykst hratt og þess vegna ekki óeðlilegt að tekjur þeirra, sem eru með svoleiðis tekjur, vaxi hraðar,\" segir Þórólfur við miðilinn.
Þá bendir prófessorinn á að aðgerðir stjórnvalda hafi einnig áhrif á tekjudreifingu: \"Í kjölfar hrunsins voru álögur á þá tekjumeiri auknar mjög mikið og núverandi ríkisstjórn hefur svona verið að draga sumt af því til baka.\"
