Útgáfa Morgunblaðsins borgar sig ekki, ekki fjárhagslega hið minnsta. Á síðasta ári var tapið 160 milljónir króna. Lætur nærri að tap af hverju tölublaði Moggans sé um hálf milljón króna.
Nánast allt hlutafé í útgáfu Morgunblaðsins er í eigu stórra og öflugra útgerðarfyrirtækja.
Kjarninn fjallar ítarlega um rekstur Árvakurs, útgáfufélags Morgunblaðsins. Þar kemur fram að Árvakur hefur tapað tæpum 1,5 milljarði króna frá 2009. Skuldir félagsins hafa verið færðar niður um 4,5 milljarða á sama tíma.
„Árvakur hefur tapað umtalsverðum fjárhæðum á undanförnum árum. Rekstrartap félagsins var 667 milljónir króna árið 2009. Árið eftir tapaði það 330 milljónum króna alls og árið 2011 nam tapið 205 milljónum króna. Tapið 2012 var 47 milljónir króna. Árið 2013 skilaði Árvakur sex milljóna króna hagnaði en 2014 var reksturinn aftur kominn öfugu megin við núllið. Þá tapaði félagið 42 milljónum króna. Ef tap Þórsmerkur í fyrra er allt vegna tapreksturs á fjölmiðlafyrirtækinu Árvakri, líkt og verið hefur árin á undan, þá nemur tap Árvakurs frá 2009, þegar uppistaðan í núverandi eigendahópi eignaðist félagið, og til loka síðasta árs verið tæplega 1,5 milljarðar króna,“ segir í úttekt Kjarnans.
