"Í kynningu Seðlabankastjóra í dag kom fram að áætlun ríkisstjórnarinnar byggist á þeirri aðgerðaáætlun sem var samþykkt 2011 og hefur verið útfærð nánar. Ég hef talsvert spurt um þetta í þinginu og fengið mismunandi svör."
Þetta skrifaði Katrín Jakobsdóttir formaður VG á vef sinn í gær um leið og hún fagnar því að ríkisstjórnin hafi loksins kynnt aðgerðir sínar um losun hafta. En hvaðan er hugmyndin komin, spyr Katrín og segir að stundum hafi verið "sagt að unnið væri að nýrri áætlun sem yrði að vera leynileg og að áætlunin frá 2011 væri byggð á algjörlega röngum forsendum,“skrifar hún og vísar þar í ræðu forsætisráðhgerra frá því í febrúar á þessu ári. „En stundum var bent á að unnið væri samkvæmt áætluninni frá 2011,“ skrifar Katrín og vísar þar í ræðu Bjarna Benediktssonar frá því í október 2013, en þar sagði hann að áfram væri unnið eftir þeirri áætlun sem hefur verið í gildi.
„Nú virðist hið síðarnefnda komið á daginn og því veltir maður því eðlilega fyrir sér hvers vegna niðurstaðan sem kynnt var í dag leit ekki dagsins ljós miklu fyrr í ljósi þess hversu miklir hagsmunir eru í húfi og af hverju hún var ekki unnin í nánara samráði við stjórnarandstöðuna. En aðalmálið er að hagsmunir almennings verði tryggðir og góð sátt náist um þær útfærslur sem nú hafa verið kynntar,“ skrifar Katrín Jakobsdóttir um málið.
Árni Páll Árnason, formaður Samfylkingarinnar, skrifaði einnig um málið á Facebook síðu sinni í dag en hann sagði góðu fréttirnar þær að haftatillögurnar væru miklu nær hugmyndum Samfylkingarinnar en Framsóknar vorið 2013. „Við vildum þá nýta svigrúm í samningum við slitabúin til að lækka opinberar skuldir. Vera Framsóknar í skýjaborgum í tvö ár er þjóðinni dýr,“ skrifar Árni Páll.
