Í sameiginlegri skýrslu frá Matvælaöryggisstofnun Evrópu (EFSA) og Sóttvarnarstofnun Evrópu (ECDC) ,sem kom út í gær, kemur fram að aukið sýklalyfjaónæmi mælist í bakteríum sem smitast á milli dýra og manna, t.a.m. salmonellu og kampýlóbakter, í Evrópu. Skýrslan sýnir að það er mikið verk fyrir höndum í baráttunni gegn sýklalyfjaónæmi. Þrátt fyrir þetta er lítið um sýklalyfjaónæmi og sýklalyfjanotkun í dýrum á Íslandi. Frá þessu er greint á heimasíðu Matvælastofnunar.
Skýrslan er samantekt á niðurstöðum ársins 2017 en áhersla var lögð á vöktun sýklalyfjaónæmis í bakteríum úr svínum og nautgripum með sýnatökum við slátrun og í kjöti á markaði. Niðurstöður voru bornar saman við niðurstöður á sýklalyfjaónæmi í salmonellu og kampýlóbakter stofnum úr fólki og þróun á milli ára. Gerð var grein fyrir tilvist fjölónæmra stofna sem eru stofnar með ónæmi gegn að minnsta kosti þremur sýklalyfjaflokkum. Niðurstöður mælinga hér á landi í fólki, svínum við slátrun, svínakjöti og nautgripakjöti koma fram í skýrslunni.
Lítið sýklalyfjaónæmi á Íslandi
Niðurstöður vegna vöktunar árið 2017 á sýklalyfjaónæmi í dýrum og matvælum á Íslandi er að finna á heimasíðu Matvælastofnunar. Helstu niðurstöðurnar þar voru að sýklalyfjanotkun í mönnum hafi aukist milli ára á Íslandi en að lítið sé um sýklalyfjaónæmi og sýklalyfjanotkun í dýrum hér á landi samanborið við önnur Evrópulönd. Sýklalyfjaónæmi er s.s. áfram fremur lágt á Íslandi miðað við nágrannaþjóðir og var það að mestu óbreytt samanborið við árið 2016.
Niðurstaðna vegna vöktunar árið 2018 á sýklalyfjaónæmi í dýrum og matvælum á Íslandi er að vænta á allra næstu dögum.
