Forkólfar Reykjavíkurborgarhafa birt lista yfir gjaldskrárhækkanir sem taka gildi um áramótin, en hlutfallslega hækkar þar mest verð á stöku sundgjaldi, en gjaldskrá leikskóla breytist ekki.
Þó hækkar fæðisgjald í skólum um 3,1 til 3,2%. Þannig hækkar fæðisgjald fyrir börn giftra foreldra eða sambúðarfólks sem er með börn í leikskóla í átta tíma á dag úr 8.060 í 8.320 krónur.
Vistun á frístundaheimilum hækkar lítillega í verði eða um 3,1 til 3,3%. Vistun í fimm daga hækkar úr 12.350 í 12.750 krónur. Fjórir dagar hækka úr 10.080 krónum í 10.400 krónur. Þrír dagar fara úr 7.780 í 8.030 krónur. Tveir dagar úr 5.480 í 5.660 krónur og einn dagur úr 3.190 í 3.290 krónur.
Framlag vegna barna hjá dagforeldrum hækkar ekkert.
Stakt gjald í sund fyrir fullorðna hækkar úr 650 krónum í 900 krónur eða um 38,5%.
Einnig hækkar gjaldið fyrir borgarstarfsmenn úr 310 krónum í 320 krónur eða um 3,2% og leiga á handklæði hækkar úr 550 í 570 krónur.
Þá hækkar gjaldskrá Fjölskyldu- og húsdýragarðsins, en miðar fyrir börn 5 til 12 ára hækka úr 600 í 620 krónur. Miðar fyrir fullorðna hækka úr 800 í 840 krónur. Sömuleiðis hækka árskort fyrir einstaklinga úr 9.300 í 9.600 krónur og árskort fyrir fjölskyldur úr 18.100 í 18.80 krónur.
Sorphirðugjald hækkar ekki, að undanskildu gjaldi vegna endurvinnslustöðva fyrir íbúðarhúsnæði sem fer upp um 14,8%, úr 6.950 krónum í 7.980 krónur. Þá hækkar gjald fyrir aukalosun úr 3.720 í 3.790 krónur.
Þjónustugjöld fyrir íbúðir aldraðra hækka einnig um 3,2% og heimaþjónusta hækkar um 3,1%. Þar að auki hækkar akstursþjónusta fyrir eldri borgara úr 1.095 krónum á ferðina í 1.130 eða um 3,2%.
Húsnæði og fæðisgjald í búsetuúrræðum hækkar loks um 3,2%.
