Í frétt RÚV segir að Stefan Löfven, forsætisráðherra Svíþjóðar hafi komist svo að orði á fréttamannafundi síðdegis í dag að ástandið eins og það væri nú í landinu gæti ekki gengið til lengdar. Önnur Evrópulönd yrðu einfaldlega að taka á móti fleiri hælisleitendum og veita fleiri flóttamönnum vernd. Löfven sagði nauðsynlegt að taka stefnu Evrópusambandsins í málefnum flóttamanna til gagngerrar endurskoðunar.
Löfven, og aðstoðarforsætisráðherran Asa Romson, kynntu drög að tímabundnum lögum, sem kveða á um ýmsar breytingar á móttöku flóttafólks í Svíþjóð. Meðal breytinganna er að fleiri flóttamenn fái hæli tímabundið. Þar til nýlega hefur fólk sem veitt er hæli í Svíþjóð, sjálfkrafa fengið landvistarleyfi til frambúðar. Frá og með apríl á næsta ári, verða það aðeins svokallaðir kvótaflóttamenn sem fá varanlegt landvistarleyfi um leið og þeir fá hæli. Þá á að setja strangari skilyrði fyrir fjölskyldusameiningum; herða kröfur um að fólk geti sýnt fram á framfærslu, vilji það fá aðra fjölskyldumeðlimi til Svíþjóðar; og setja strangari skilyrði fyrir veitingu dvalarleyfis af mannúðarástæðum, að því er fram kemur í nefndri frétt RÚV.
