Tilkynningum um köngulær sem líkjast svörtu ekkjunni hefur rignt yfir Náttúrufræðistofnun Íslands eftir fréttir um að svarta ekkjan hefði mögulega fundist í vínberjapoka í Krónunni á dögunum. Sjö svartar köngulær með rauðan blett hafa fundist í vínberjapokum upp á síðkastið; ein þeirra af ekkjutegund og hinar sex af „áhugaverðri ætt stökkköngulóa“.
„Í aðdraganda jóla skjóta iðulega upp kollum hin ýmsu kvikindi sem borist hafa til landsins með fjölbreyttum innflutningi vegna jólahaldsins. Sitthvað berst til dæmis með dönsku jólatrjánum, allskyns glingri, fersku grænmeti og ávöxtum. Á aðventunni að þessu sinni ber hæst köngulær sem fólk hefur fengið í kaupbæti með amerískum vínberjum,“ segir í frétt á vef Náttúrufræðistofnunar.
Köngulærnar fundust allar á höfuðborgarsvæðinu og tilheyra tegund sem hefur ekki fundist hér á landi áður.
„Allar höfðu þær fengist í kaupbæti með amerískum vínberjum sem fólk hafði keypt í verslunum úr einni og sömu verslunarkeðjunni. Þær vöktu nokkurn ugg, svartar á lit með rauða bletti, reyndar á baki en ekki kviði. Tegund þessi er algeng í Norður-Ameríku og hefur verið nefnd krúnukönguló (Phidippus audax).“
Tilkynningarnar byrjuðu að berast eftir fréttir um að par í Garðabæ hefði fundið könguló sem líktist svörtu ekkjunni í vínberjapoka. Vínberin voru frá Norður-Ameríku og köngulóin reyndist vera krúnukönguló sem er algeng á þeim slóðum.
Svarta ekkjan er samheiti yfir um þrjátíu tegundir af ekkjuköngulóm en engar líkur eru á að þær þrífist í íslensku loftslagi eða nái hér fótfestu.
„Hins vegar gerist það stundum að ekkjuköngulær berist til landsins með varningi, oftast væntanlega með vínberjum innfluttum frá Norður-Ameríku. Í safni Náttúrufræðistofnunar Ísland eru varðveitt alls 13 eintök sem hingað hafa borist. Flest hafa fundist á höfuðborgarsvæðinu, auk þess á Grundartanga, Selfossi og Húsavík. Það elsta fannst í Reykjavík árið1998 en öll önnur tilfelli eru frá þessari öld.“
Grein Náttúrufræðistofnunar Íslands má lesa mér.
