\"Þann 19. júní næstkomandi fögnum við því að 100 ár eru frá því að konur fengu atkvæðisrétt þó aðeins ef þær voru 40 ára og eldri. Meira að segja árið 1915 datt mönnum ekki í hug sú arfavitlausa hugmynd að láta konur fá hálfan atkvæðisrétt!\"
Þetta skrifar Thomas Möller í nýjasta pistli sínum á hringbraut.is og bætir við: \"Samt hafa konur sunnan ganganna aðeins um hálft atkvæði í dag árið 2015 miðað við konur norðan ganganna.\"
Í pistlinum veltir hann fyrir sér hvaða áhrif jöfnun atvkæðisréttar hefði á íslenska pólitík og vitnar þar í stjórnmálafræðinginn Gunnar Helga Kristinsson sem hefur rannsakað misvægi atkvæða: \"Gunnar Helgi sagði eitt sinn í viðtali við Morgublaðið að “jöfnun atkvæðisréttar myndi breyta valdahlutföllum stjórnmálaflokkanna, sérstaklega innan þingflokka, og sjónarmið sem ríkjandi séu í þéttbýli fengju meira vægi.\" Hann nefnir stuðning við aðild að ESB sem dæmi: „Það hefur alltaf verið þannig að stuðningur við aðild hefur verið meiri á höfuðborgarsvæðinu heldur en á landsbyggðinni. Það þýðir auðvitað að andstaðan við aðild hefur verið vigtuð með sterkari þætti inn á þingið og væntanlega inn í stjórnmálaflokkana en ella.\"
Thomas furðar sig á því að misvægi atkvæða á Íslandi sé meiri en þekkist á nokkru öðru byggðu bóli Evrópu - og bendir á \"að þingmaður í Suðvesturkjördæmi þar sem atkvæðavægið er minnst þarf 82 prósent fleiri atkvæði til að komast á þing en þingmaður í Norðvesturkjördæmi, en þar er atkvæðavægið mest. Á bak við hvert þingsæti í Suðvesturkjördæmi eru 4858 atkvæði, en á bak við hvert þingsæti í Norðvesturkjördæmi eru 2668 atkvæði.\"
Hann leggur til eftirfarandi tillögu í loks pistils síns: \"Því legg ég til að á hverju ári verði farin Hvalfjarðarganga ( samanber Keflavíkurgönguna hér áður fyrr) þar sem við hálfdrættingarnir sunnan gangnanna förum í kröfugöngu gegnum göngin og mótmælum hinum megin því óréttlæti sem við búum við.\"
