Björgólfur Thor Björgólfsson athafnamaður segir stóra skúrkinn í hruninu hafa verið íslensku krónuna. Hann hafi sjálfur litið í eigi barm, gagnrýnt sjálfan sig og beðist afsökunar á sínum hlut. Aðrir hafi hins vegar ekki leikið það eftir. Í dag séu hættumerki á lofti en lærdómurinn sé lítill. Þetta kemur fram í nýjum pistli sem hann birtir á heimasíðu sinni í dag.
„Í þeirri miklu þenslu, sem átti sér stað á örfáum árum fram að hruni, var ýmislegt sem leiddi til þess að bankarnir stækkuðu fram úr hófi og voru orðnir óviðráðanlegir fyrir lítið hagkerfi þegar að þrengdi haustið 2008. Allt blasir það við núna. Bankarnir höfðu nær ótakmarkað aðgengi að ódýru fé. Minnsti gjaldmiðill heims gat ekki staðið undir þeirri vaxtamunarstefnu, sem rekin var á Íslandi,“ segir Björgólfur meðal annars um krónuna.
„Það er dramatískt að leita að aðalleikurum í hruninu í hópi banka- og viðskiptamanna, en stóri skúrkurinn var krónan. Þar hafa menn ekkert lært, með núverandi hávaxtastefnu og verðtryggingu, sem sligar almenning.“
„Þetta var erfitt ferðalag“
Hann segist hafa litið í eigin barm í kjölfar hrunsins og horft gagnrýnin á athafnir sínar. Hans leið til að takast á við baráttuna hafi verið að skrifa bók þar sem hann fór yfir sögu sína í viðskiptum; baslið, ævintýralegan uppgang, ofurgróða, mistökin sem hann gerði, hrunið sjálft og hvernig honum tókst að vinna úr hremmingunum. „Þetta var erfitt ferðalag, en ég tel það hafa styrkt mig og hjálpað mér að takast á við reiðina og biturleikann, sem ég fann fyrir í kjölfar hrunsins.“
Björgólfur segir einnig mikilvægt að skoða hvað gerðist eftir hrun. Þar sé hann stoltastur af skuldauppgjöri við alla sína lánadrottna, en hann hafi verið í gríðarmiklum persónulegum ábyrgðum þegar hrunið skall á. „Þannig borgaði ég yfir 100 milljarða króna til íslenskra banka í beinhörðum peningum, meira að segjaí erlendri mynt. Margfalt hærri upphæðir voru greiddar til erlendra banka.“
Nánar á
https://www.mbl.is/frettir/innlent/2018/10/08/stori_skurkurinn_var_kronan/
