Eftir tvo til þrjá daga munu vegaframkvæmdir Vesturverks í Ófeigsfirði ná að landi Seljaness. Framkvæmdirnar eru hluti af fyrirætlunum um Hvalárvirkjun. En ekki er víst að framkvæmdirnar gangi átakalaust fyrir sig því hluti landeigenda Seljalands telur sig í fullum rétti til að stöðva framkvæmdirnar og það jarðrask sem þeim fylgir.
Þetta kemur fram í Morgunblaðinu í dag. Þar er haft eftir Guðmundi Hrafni Arngrímssyni, talsmanni hluta landeigenda á Seljanesi, að þeir séu í rétti til að stöðva jarðrask á landi þeirra. Það verði látið reyna á lagabókstafinn í þessu.
„Þeir fara ekki inn á Seljaneslandið nema að því öllu fullreyndu. Við teljum okkur síðan í rétti til að stöðva allt jarðrask á landinu af því að ekkert samráð var haft við okkur. Við munum gera það; stöðvaverktakana áður en þeir fara inn í Seljaneslandið.“
Er haft eftir Guðmundi sem fundaði með lögfræðingum í gær vegna málsins. Hann segist setja spurningamerki við aðkomu Vegagerðarinnar að málinu en hún framseldi veghald til Vesturversk sem hyggst reisa Hvalárvirkjun.
„Þeir eru að djöflast inn af Ingólfsfirðinum og eru að vinna í landi hreppsins. Við eigendur að Seljanesi höfum enga lögsögu til að fárast út í það en það líður að því að þeir komi að landamerkjum Árneshrepps og Seljaness. Við teljum að þeim sé ekki heimilt að fara inn á þetta land þar sem ekki hafi verið rétt staðið að yfirfærslu vegarins í vegakerfið,“
Er haft eftir honum og einnig sagði hann að áhöld væru um hver hafi lagt veginn og hvenær og hvort Vegagerðin hafi haft heimild til að framselja veghaldið.
„Vegagerðin telur sig vera í rétti og að vegurinn sé á þjóðvegaskrá. Það var ekki fyrr en 2004 að vegurinn var settur á skrá Vegagerðarinnar og þá alls ekki í samráði við landeigendur. Þeir telja til að þeir hafi kostað vegabætur árið 2003, en það fór allt fram í landi hreppsins.“
Ef haft eftir Guðmundi sem vísaði þarna til að talað sé um þjóðveginn að Eyri en frá Eyri og að Seljanesi sé aðeins slóði.
