Ljóst er af svörum Bjarna Benediktssonar formanns Sjálfstæðisflokksins og fjármálaráðherra að honum er verulega misboðið vegna harkalegs útspils Eyglóar Harðardóttur félagsmálaráðherra um helgina. Bjarni snuprar hana harkalega í svörum sínum. Óvanalegt er að ráðherrar talist við með þessum hætti í gegnum fjölmiðla.r
Í grein í Kjarnanum í dag þar sem vitnað er í mbl.is, segir Bjarni það rangt að hann hafi gert efnislega athugasemd við frumvarpið og að hann hafi viljað að Eygló endurkallaði það af efnislegum ástæðum. „Ég verð að lýsa mikilli furðu á því upphlaupi sem hefur orðið út af þessu tiltekna máli allt frá því að það var fyrst lagt fram til kostnaðarmats í fjármálaráðuneytinu,“ segir Bjarni.
Hann segir enn fremur að Eygló verði að sætta sig við að frumvarp hennar lúti sömu reglum og önnur slík; fumvörp þurfi að vera fullunninn áður en kostnaðarmat sé framkvæmt. Að því loknu séu þau tekin á dagskrá í ríkisstjórn og því næst í þingflokkum stjórnarflokkanna ef ríkisstjórnin hefur ákveðið að leggja þau fram á Alþingi. „Félagsmálaráðherra verður einfaldlega að sætta við það að þetta mál sé unnið eftir sömu reglum og önnur mál,“ segir Bjarni á mbl.is og hefur lýst þeirri skoðun sinni að ekki sé hægt að kostnaðargreina frumvörp sem fagráðherra sjálfur sé sífellt að hræra í.
Ráðherrar í ríkisstjórn Sigmundar Davíðs Gunnlaugssonar hafa ekki áður talað með þessum þætti hvor við annan í gegnum fjölmiðla, en eftir því hefur verið tekið um helgina hversu harður tónn formanns Sjálfstæðisflokksins hefur verið í garð eins af ráðherrum Framsóknarflokksins.
Stjórnmálafræðingar sem hringbraut.is hefur verið í sambandi við vegna málsins í dag segja að meta megi ástandið innan stjórnarflokkanna sem svo að það sé eldfimt.
