Heldur vænkast hagur Strumpu ef stjórnvöld mega heita svo, en stuðningur við ríkisstjórnina mælist nú öllu hærri en verið hefur á undanliðnum mánuðum, en 36% landsmanna segjast nú styðja stjórnina.
Þetta kemur fram í nýjasta þjóðarpúlsi Gallup, en þar sést að fylgi stjórnvalda er heldur á uppleið eftir að hafa farið niður fyrir 30% sem eru meiri óvinsældir en ríkisstjórn vinstriflokkanna glímdi við um miðbik síðasta kjörtímabils.
Á sama tíma og fylgi Pírata dalar heldur, eða um tvö prósentustig, rís land stjórnarflokkanna semr bæta hvor um sig um tveimur prósentustigum við fylgi sitt og mælist Sjálfstæðisflokkurinn með 24,5% fylgi og Framsóknarflokkurinn með 11,3% fylgi. Píratar tapa sem fyrr segir tveimur prósentustigum og mælast nú með 31,8%. Það er áfram mesta fylgi nokkurs flokks.
Samfylkingin og Björt framtíð tapa hvor um sig um prósentustigi, en Samfylkingin mælist með 11,4% og Björt framtíð með 6,4%. Vinstri hreyfingin grænt framboð mælist með 10,3% fylgi. Fylgi annarra flokka breytist lítið.
Rúmlega 11% taka ekki afstöðu eða neita að gefa hana upp og rúmlega 10% segjast myndu skila auðu eða ekki kjósa ef kosið yrði til Alþingis í dag
