Eldheitar umræður urðu um frumvarp stjórnvalda til að fresta verkföllum heilbrigðisstarfsfólks á Alþingi eftir að umræðan fór loks í gang, en ósætti var fram eftir degi um tilhögun þingfundar.
Yfirlýsingagleðin var ekki síst í máli Steingríms J. Sigfússonar þingmanns VG sem sagði í pontu um atkvæðagreipsluna og sér væri skapi næst að greiða atkvæði gegn því að málið kæmist á dagskrá. Skaðinn væri hins vegar þegar skeður gagnvart samningsrétti og stjórnarskrárvörðum lýðréttindum í landinu með því að frumvarpið væri komið fram.
Í miðri ræðunni kallaði Bjarni Bendiktsson fjármálaráðherra fram í ræði Steingríms, en hann situr beint fyrir aftan pontu Alþingis: \"Hvað um sjúklingana?“ Brást Steingrímur ókvæða við frammíkallinu og spurði þá ráðherra hvort hann ætlaði að bera það upp á stjórnarandstöðuna að henni væri skítsama um sjúklinga: \"Er það innleggið? Nei, menn skulu bara tala skýrt. Ef að hæstvirtur fjármálaráðherra vill leggja það inn í umræðuna að þeir sem leyfa sér að andmæla ríkisstjórninni sé skítsama um sjúklinga þá vil ég biðja hann að segja það en ekki gjamma það hérna fram í eins og lítill skólastrákur,“ sagði Steingrímur og var heitt í hamsi.
Þingfundi dagsins lauk ekki fyrr en á ellefta tímanum í kvöld. Hefur annar verið áformaður eftir hádegi á morgun til að ræða frekar frrumvarp ríkisstjórnarinnar á verkfallsaðgerðir félaga í BHM og Félags íslenskra hjúkrunarfræðinga.
Í lok fundarins í kvöld var tilkynnt að málið myndi ganga til allsherjar- og menntamálanefndar.
