Líkur fara nú ört vaxandi á því að iðnaðarmenn hér á landi fari í verkfall, en einungis fimm dagar þar til iðnaðarmenn leggja niður vinnu en samningafundir þeirra við viðsemjendur eru ennþá í hnút.
"Núna erum við bara að undirbúa okkur undir verkfallsátökin sem eiga að hefjast í næstu viku,“ segir Borgþór Hjörvarsson, varaformaður Rafiðnaðarsamband Íslands við Morgunblaðið í morgun, en verkfallsaðgerðir sambandsins og fimm annarra stéttarfélaga iðnaðarmanna hefjast að öllu óbreyttu 10. júní næstkomandi.
Borgþór segir að verkfallið sem á að hefjast á miðvikudaginn standi enn til og að því hafi ekki verið frestað. Hann segir jafnframt að samninganefnd Samtaka atvinnulífsins hafi boðið iðnaðarmönnum sömu samninga sem samninganefndir VR, Flóabandalagsins, LÍV og StéttVest, undirrituðu í síðustu viku. „Þeir vilja bara láta okkur fá sömu samningana en við teljum að það sé ekki nóg, enda störfin ekki sambærileg,“ segir Borgþór.
Ljóst er að verkfall iðnaðarmanna getur haft mikil áhrif hér á landi. Borgþór segir við blaðið að verkfall rafvirkja geti haft mikil áhrif, m.a. við flug en meðal þeirra sem myndu leggja niður störf eru rafvirkjar og rafeindavirkjar á Keflavíkurflugvelli og Reykjavíkurflugvelli. Þeir sjá m.a. um viðhald á ljósabúnaði á flugvöllum og flugleiðsögubúnaði. „Við náttúrulega sinnum öllum neyðartilvikum, eins og til dæmis með sjúkraflugið og þessháttar. Þá mun verkfallsstjórnin veita undanþágu. En við munum ekki sinna öðrum verkum nema það sé eitthvað mjög sérstakt.“
