Að því er fram kemur á fréttaveitu RÚV verða útgjöld ríkissjóðs tæpir 690 milljarðar króna á næsta ári samkvæmt breytingartillögum meirihluta fjárlaganefndar og hækka um níu milljarða miðað við fyrirliggjandi fjárlagafrumvarp. Þá er nú gert ráð fyrir 10,7 milljarða afgangi í ríkisrekstrinum, eða 4,6 milljarða lakari afkomu en kveðið er á um í frumvarpi fjármálaráðherra. Í tillögunum er ekki gert ráð fyrir frekari framlögum til rekstrar Landspítalans, en spítalinn fær tæpa fimmtíu milljarða króna úr ríkissjóði samkvæmt fjárlagafrumvarpinu. Stjórnendur Landspítalans telja að spítalinn þurfi tæpa þrjá milljarða að auki í grunnreksturinn vegna aukinnar eftirspurnar, til að fjármagna brýnustu viðhaldsverkefni og húsnæðisframkvæmdir og til að standa undir læknasamningunum svokölluðu.
\"Við erum fyrst og fremst mjög vonsvikin og auðvitað undrandi líka vegna þess að við höfum lagt okkur fram um að upplýsa fjárveitingarvaldið mjög vel um þessa þróun á eftirspurn eftir þjónustu spítalans og svo framvegis, hvað þurfi til að halda því úti, þannig að þetta kemur mjög á óvart,“ segir María Heimisdóttir, framkvæmdastjóri fjármálasviðs Landspítalans í samtali við fréttaveituna.
Í frétt hennar segir að í breytingartillögum meirihluta fjárlaganefndar sé gert ráð fyrir 840 milljóna króna framlagi í sérstakt átak að stytta biðlista eftir völdum skurðaðgerðum og þá verði um 320 milljónum varið til uppsetningar og þjálfunar starfsfólks vegna jáeindaskanna sem Íslensk erfðagreining færði spítalanum að gjöf nýverið. María segir við RÚV að alvarlegt megi teljast að sjónarmið Landspítalans hafi ekki náð eyrum meirihluta fjárlaganefndar. Lítið svigrúm sé til frekari hagræðingaaðgerða hjá spítalanum: \"Við reynum eins og alltaf að halda okkur innan fjárheimilda, en okkur eru ætluð ákveðin verkefni samkvæmt lögum og eins og eftirspurn eftir þessari þjónustu hefur verið undanfarin ár, þá er alls ekki hægt að útiloka að við lendum í halla á árinu 2016.“
