Halldór Halldórsson, formaður Sambands íslenskra sveitarfélaga, var gestur í hádegisútvarpi Þjóðbrautar. Halldór ræddi þar stöðuna sem er í grunnskólunum. Hann benti á að fjárveitingar til íslenska grunnskóla séu með því hæsta innan OECD, en laun kennara eru að sama skapi með þeim lægstu sem þekkjast innan OECD.
En hvers vegna? Því er erfitt að svara, sagði Halldór en benti á að starfsfólki skólanna hafi fjölgað mikið, vel umfram fjölgun nemenda. Þá hefur starf innan skólanna aukist og eins hefur skóli án aðgreiningar kostað talsverða peninga.
Halldór hafnar þeim kenningum að ekki hafi verið rétt reiknað í upphafi, það er þegar grunnskólarnir voru fluttir frá ríki til sveitarfélaga.
„Við erum með einn dýrasti skólann, innan OECD, sem skilar sér ekki í launum til kennara. Við verðum að skoða hvað veldur.“
En hefur kjararáð með nýjustu úrskurðum sínum kallað á þau viðbrögð kennara að þeir segja nú upp störfum?
Halldór sagði það eflaust hafa áhrif. „Árið 2014 varð mikil hækkun á launum grunnskólakennara og þeir hækkuðu umfram marga aðra. Svo má ekki gleymast að við sitjum við samningaborðið, Félag grunnskólakennara og sveitarfélögin, alla daga undir stjórn ríkissáttasemjara. Það er ekki einsog við ekki sé samningsvilji. Sú reiði sem brýst út núna getur ekki verið vegna þess að sveitarfélögin vilji ekki semja.“
