Bragi Guðbrandsson, fyrrverandi forstjóri Barnaverndarstofu, beitti sér fyrir því að ungur maður fengi að umgangast dætur sínar sem hann var grunaður um kynferðisbrot gegn. Stundin skýrði frá þessu í dag.
Í frétt Stundarinnar segir að Bragi hafi átt ítrekuð samskipti við föður mannsins, Þjóðkirkjuprest, sem er málkunnugur Braga frá því þeir störfuðu báðir við barnaverndarmál.
Í umfjöllun Stundarinnar segir að Ásmundur Einar Daðason félagsmálaráðherra hafi verið upplýstur um málið og afskipti Braga Guðbrandssonar af umræddu barnaverndarmáli á fundi í ráðuneytinu í janúar í vetur.
Halldóra Mogensen, formaður velferðarnefndar Alþingis og þingmaður Pírata, hefur boðað Ásmund Einar á opinn fund í velferðarnefnd næstkomandi mánudag. Hún segir í tilkynningu sem hún sendi frá sér í dag:
„Við lestur Stundarinnar fæ ég ekki séð betur en Ásmundur Einar hafi sagt ósatt í þingsal Alþingis 26. febrúar þegar ég spurði hann út í ásakanir á hendur forstjóra Barnaverndarstofu. Þar sagði hann orðrétt „Barnaverndarstofa eða forstjóri hennar hafa ekki brotið af sér með neinum hætti\". En samkvæmt fréttum Stundarinnar hafði hann fulla vitneskju um þetta mál og afskipti Braga Guðbrandssonar af því.
Í stað þess að láta Braga sæta ábyrgð á gjörðum sínum er honum verðlaunað með stuðningi ríkisstjórnarinnar við framboð hans til Barnaréttarnefndar Sameinuðu þjóðanna.“
Bragi, sem fékk í febrúar ársleyfi frá störfum sem forstjóri Barnaverndarstofu, var
útnefndur sem frambjóðandi Íslands til Barnaréttarnefndar Sameinuðu þjóðanna á ríkisstjórnarfundi þann 23. febrúar. Katrín Jakobsdóttir, forsætisráðherra segir í
samtali við Kjarnann að mál Braga Guðbrandssonar, fyrrverandi forstjóra Barnaverndarstofu, hafi ekki borið á góma á fundi ríkisstjórnarinnar þegar samþykkt var að hann yrði frambjóðandi Íslands til Barnaréttarnefndar Sameinuðu þjóðanna, en hún ætli að ræða við jafnréttis- og félagsmálaráðherra. Hún vildi þó ekki svara því hvort þetta mál breytti einhverju um stuðninginn við Braga til Barnaréttarnefndar.
