Ef verð á útseldum tíma til löglærðra verjenda í sakamálum er borið saman á ákveðnu tímabili við kjör ófaglærðs verkafólks virðist niðurstaðan að hin menntaða stétt lögmanna hafi fengið mun meiri kjarabætur en hinir ófaglærðu.
Lægsti launataxti Starfsgreinasambandsins sumarið 2009 var kr. 144.502. Fimm og hálfu ári síðar, 1. janúar árið 2015, hafði lægsti taxtinn hækkað í kr. 201.317. Hækkunin nam á tímabilinu 39,31%. Lágmarkslaun frá 1. júlí 2009 voru krónur 157.000. 1. janúar 2015 voru launin komin upp í 214.000, hækkunin nemur 36,30%.
Þessar tölur, sem Björn Snæbjörnsson formaður Starfsgreinasambandsins tók saman fyrir Hringbraut, eru nefndar til sögunnar vegna fréttar Hringbrautar í gær. Þar kom fram að löglærðir verjendur í sakamálum fengu mikla leiðréttingu á útseldum tíma í sakamálum í ársbyrjun 2015. Þá hækkaði verðið úr 10.000 krónum í 16.500 sem er 65% hækkun.
Lögmaður sem Hringbraut ræddi við nefndi að kjarastökkið hefði verið leiðrétting eftir hrunið og það tekjufall sem lögmenn líkt og margar aðrar stéttir tóku á sig þegar ríkiskassinn var tómur. Ekki væri um laun að ræða heldur þóknun fyrir útseldan tíma sem lögmenn bæru ýmsan kostnað af.
Eigi að síður er kjarastökk þeirra lögmanna sem sinna þessari vinnu meira en ófaglærðra, 65% á meðan ófaglært fólk hækkaði á sama tímabili um 36-40%. Niðurstaðan er vísbending um að hinir tekjuhærri í samfélaginu hafi að jafnaði hagnast meir á launaskriði síðari missera en ófaglærðir sem vekur upp spurningar um jöfnuð og græðgi að mati formanns Starfsgreinasambandsins.
„Það er greinilegt að þeir sem geta skammtað sér launin eru ekki að hafa áhyggjur af að allt fari til fjandans í þjóðfélaginu eins og sagt er þegar lægstu laun hækka. Þetta er spegilmynd af einhverju sem kallast græðgi,“ segir Björn Snæbjörnsson, formaður Starfsgreinasambandsins, ómyrkur í máli.
