Samkvæmt nýbirtri spá Seðlabankans verður hagvöxtur um 4½% í ár og að meðaltali tæplega 4% á ári á spátímanum, sem er meiri vöxtur en bankinn spáði í febrúar.
Að mati bankans myndast svokölluð framleiðsluspenna á þessu ári og nær hámarki á því næsta. Forsvarsmenn bankans segja að batinn á vinnumarkaði hafi færst í aukana að undanförnu. Sé tekið mið af hinum miklu launakröfum sem nú eru uppi mætti ætla að spenna á vinnumarkaði sé nú þegar til staðar eða að slaki hafi a.m.k. minnkað hraðar en samrýmist verðstöðugleika.
Meðalhagvöxtur á Íslandi hefur á síðustu áratugum verið undir meðaltali ríkja sem eiga aðild að EFTA og ESB samkvæmt skýrslu sem fjallar um aukningu meðalhagvaxtar miðað við þjóðarframleiðslu á íbúa. Tekin voru þar tvö tímabil, annars vegar frá 1980-1995 og hins vegar frá 1995-2002. Ef einungis er miðað við þau 18 OECD ríki sem hafi átt aðild að EFTA og ESB á tímabilinu kom í ljós að Ísland lendir í 16. sæti þessara ríkja á fyrra tímabilinu og því 8. á því síðara og er í báðum tilvikum undir meðaltalshagvexti í þessum ríkjum.
Ný hagvaxtarspá Seðlabanka Íslands sýnir að Ísland ætti að geta klifrað upp þennan lista sem greint er frá í fyrrnefndri skýrslu.
