Aðeins ættleiðing getur tryggt stjúpbörnum erfðarétt til jafns við börn sem hjón eiga saman. Hins vegar er hægt að tryggja að arfur verði séreign barna, með því að gera erfðaskrá.
Þetta þýðir að börn erfa foreldra sína, án þess að makar þeirra eigi tilkall til þess arfs.
Þetta kom fram í þættinum Ég bara spyr, sem Hringbraut sýndi í gærkvöld, en hægt er að nálgast þáttinn hér á vef stöðvarinnar, hringbraut.is. Þar voru erfðamálin rædd, en Rakel Sveinsdóttir, umsjónarmaður þáttanna, segir fólk almennt spyrja mikið um erfðamál og ljóst að mörg mál koma upp hjá fjölskyldum, þar sem fólk veltir fyrir sér hvernig erfðarétturinn virkar.
Þá var rætt sérstaklega um lánaábyrgðir og skuldir, en Hæstiréttur kvað upp þann úrskurð á dögunum, að börn Steingríms Hermannssonar heitins, þurfi að greiða námslán sem hann var í ábyrgðum fyrir son sinn í Bandaríkjunum.
Gestur þáttarins var Gísli Tryggvason, lögmaður. Hann segir flókin fjölskyldumynstur oft gera það að verkum að flækjustig koma fram við andlát foreldra. Að sögn Gísla, erfast skuldir almennt ekki, en ábyrgðir námslána geta þó gert það, eins og mál Steingríms hefur sannað. Þá segir Gísli það algengan misskilning að fólk telji sambúð í áratugi, tryggja makanum erfðarétt. Svo sé ekki.
Ég bara spyr er á dagskrá Hringbrautar öll þriðjudagskvöld.
