Kínversk kona, sem var bjargað meðvitundarlausri úr Silfru á Þingvöllum á þriðjudag, er látin. Hún var 26 ára gömul. Konan hafði verið ásamt manni sínum á vegum ferðaþjónustufyrirtækis að kafa í gjánni.
Samkvæmt upplýsingum lögreglunnar á Suðurlandi sökk konan niður á um 30 metra dýpi og var henni eftir nokkurn tíma komið upp á yfirborðið meðvitundarlausri. Tilkynning um slysið barst í hádeginu á þriðjudag og var þegar kallað eftir aðstoð þyrlu Landhelgisgæslunnar sem flutti konuna á Reykjavíkurflugvöll þar sem sjúkrabíll beið og flutti hana á gjörgæsludeild Landspítalans. Þar var hún úrskurðuð látin í dag.
Þorgrímur Óli Sigurðsson, aðstoðaryfirlögregluþjónn á Suðurlandi, segir við mbl.is í dag að búnaður konunnar, sem skilinn var eftir í gjánni á þriðjudag, hafi nú verið fluttur til rannsóknar hjá tæknideild lögreglunnar.
Á þessari stundu er ekki vitað hvað olli slysinu: \"Hún sökk niður á 30 metra dýpi, en atvikið átti sér upphaflega stað rétt undir vatnsyfirborðinu. Hún virðist lenda í einhverjum straumi,“ segir Þorgrímur Óli í samtali við mbl.is en talið er að konan hafi verið í kafi í um 10 mínútur áður en henni var komið upp á yfirborðið.
