Þetta kemur fram á fréttavef RÚV, en þar er haft eftir starfsfólki úr fjármálaráðuneytinu að gert sé ráð fyrir að Hannes skili stuttri framvinduskýrslu fyrir áramót og lokaskýrslu fljótlega eftir áramót.
Eins og fram kemur í fréttinni samdi fjármálaráðuneytið í fyrra við Félagsvísindastofnun Háskóla Íslands um að meta erlenda áhrifaþætti í bankahruninu á Íslandið haustið 2008. Hannes var ráðinn til að vinna rannsóknina og fékk til liðs við sig þá Birgi Þór Runólfsson og Ásgeir Jónsson, dósenta í hagfræði við Háskóla Íslands. Hannes átti frumkvæði að rannsókninni og samdi um verkefnið við ráðuneytið, að því er Guðbjörg Andrea Jónsdóttir, forstöðumaður Félagsvísindastofnunar sagði í fréttum í fyrra. Samið var um tíu milljóna greiðslu fyrir verkið. Búið er að greiða 7,5 milljónir en lokagreiðsla upp á 2,5 milljónir að að greiðast við verklok.
Jafnframt segir í fréttinni að Hannes hafi unnið að rannsóknum á erlendum áhrifaþáttum hrunsins síðastliðin tvö ár. Hann hafi í ársbyrjun vakið athygli á nýjum fundargerðum Englandsbanka sem þá hefðu nýverið birst opinberlega. Hann sagði athyglisvert að þar kæmi fram það sjónarmið að Englandsbanki hefði litið tilraunir Íslendinga til að gera Ísland að fjármálamiðstöð hornauga.
Hannes sagði í samtali við fréttastofu RÚV í sumar að vinna við skýrsluna gengi ljómandi vel en tæki þó lengri tíma en að var stefnt. Hann sagði þá að hægt væri að birta minni skýrslu strax ef fólk vildi en ítarlegri skýrsla fengist með því að bíða aðeins.
