„Ég ætlaði ekki að tjá mig um skrif Stefáns Einar enda ekki svara vert. En því miður get ég ekki lengur orða bundist enda hefur Stefán núna ítrekað farið með dylgjur og ósannindi um málefni WOW air.“
Svona byrjar Facebook færsla Skúla Mogensen, fyrrverandi forstjóra WOW air, sem hann birti í dag. Hann segir í færslu sinni að Stefán Einar Stefánsson, fréttastjóri á Morgunblaðinu og höfundur bókar um fall WOW, hafi farið ítrekað með dylgjur og ósannindi um WOW air í skrifum sínum og málflutningi.
Í færslunni telur hann upp nokkur atriði sem hann segir Stefán Einar fara með rangt mál. Meðal annars sem hann segir er að ítrekaðar rangfærslur Stefán Einars hafi verið dýrkeypt flugfélaginu þegar samningaviðræður um nýtt skuldabréfaútboð hafi verið á loka metrunum.
„Alvarlegast var þegar hann fullyrti að WOW air skuldaði Isavia 2 milljarða í stórri forsíðugrein sem Morgunblaðið birti 15. september 2018 þegar við vorum á loka metrunum við að klára umrætt skuldabréfaútboð. Núna liggja fyrir gögn sem sýna svo ekki verður um villst að skuld okkar við Isavia var nær einum milljarði á þessum tíma en ekki tveim milljörðum eins og Stefán Einar fullyrti. Þessi frétt og sú umræða sem skapaðist í framhaldinu hafði mjög neikvæð áhrif á skuldabréfaútboðið og starfsemi WOW air.“
Að lokum segir Skúli að hann ætli ekki að skorast undan ábyrgð sinni vegna falls félagsins og óskaði hann þess að hann hefði mögulega átt að gera ýmislegt öðruvísi.
„Eins og ég hef ítrekað sagt skorast ég ekki undan ábyrgð minni í falli félagsins og klárlega vildi ég óska þess að við hefðum gert ýmislegt öðruvísi. Ég er sannfærður að það hefði verið hægt að bjarga WOW air og þeim miklu verðmætum sem þar lágu ekki síst fyrir þjóðarbúið og íslenska neytendur. Það líður vart sá klukkutími að ég hugsi ekki um WOW air, þann frábæra hóp starfsfólks sem gerði WOW að veruleika, farþega okkar og allt sem við vorum búin að byggja upp í sameiningu,“ segir Skúli.
Hér að neðan má svo sjá færslu Skúla í heild sinni:
Ég ætlaði ekki að tjá mig um skrif Stefáns Einar enda ekki svara vert. En því miður get ég ekki lengur orða bundist enda hefur Stefán núna ítrekað farið með dylgjur og ósannindi um málefni WOW air. Hér eru örfá dæmi eftir nýjustu umfjöllun hans í þættinum Sprengisandi í morgun.
1. Það er alfarið rangt að Ben Baldanza hafi komið í stjórn WOW air fyrir tilstuðlan eða þrýsting frá Airbus eða einhverja aðra hagsmunaaðila. Staðreyndin er sú að ég hringdi í Ben skömmu eftir að hann hætti hjá Spirit Airlines og hann kom til Íslands nokkrum dögum seinna og við ákváðum að bjóða honum í stjórn WOW air sem hann þáði. Eina aðkoma Airbus var að ég hringdi í vin minn hjá Airbus sem gaf mér símanúmerið hjá Ben svo að ég gæti haft samband við hann. Að öðru leyti hafði Airbus ekkert með aðkomu Ben að félaginu að gera.
2. Það er alfarið rangt að Airbus og leigusalar hafi haft miklar áhyggjur af rekstri WOW air um það leyti sem Ben kemur í stjórn félagsins í byrjun árs 2016. Á þessum tíma var afkoma og rekstur WOW air mjög góður og kepptust flugvélaframleiðendur og leigusalar að selja/og eða leigja WOW air fleiri flugvélar. WOW air skilaði góðum hagnaði bæði 2015 og 2016 þannig að þessar fullyrðingar standast engan veginn.
3. Það er einnig alfarið rangt að ég og stjórn félagsins hafi viljandi hundsað aðvörunarorð annara í flugheiminum. Það er mjög auðvelt að vera vitur eftir á og eins og við höfum útskýrt þá liggur núna fyrir að við gerðum mikil mistök að færa okkur frá lággjaldastefnunni og að innleiða breiðþoturnar inn í leiðarkerfi okkar. Þetta reyndist dýrkeypt mistök en augljóslega töldum við þær réttar þegar þær voru teknar. Allar stærri ákvarðanir voru ræddar ítrekað á stjórnarfundum félagsins þar með talið flotamál og leiðarkerfi félagsins. Ben tók virkan þátt í þeim umræðum og var oft með gott innlegg í umræðuna en hann skilaði aldrei séráliti um nein málefni félagsins né í neinum ákvörðunum sem teknar voru á stjórnarfundum WOW air.
4. Það er einnig alfarið rangt að helmingurinn af 6 milljarða skuldabréfa útboði WOW air hafi verið skuldaleiðrétting eða skuldbreyting. Þetta er rangt og stenst enga skoðun enda hefur ekkert komið fram sem styður þessa fullyrðingu Stefán Einars.
5. Varðandi samtal okkar við Icelandair í byrjun september þá var það á mjög óformlegum nótum. Ég hitti fyrst Ómar Benediktsson fyrir tilviljun á flugráðstefnu í London og við spjölluðum saman. Það var ákveðið að við myndum fá okkur kaffi þegar heim var komið með Boga Níls forstjóra Icelandair. Ég og Ragnhildur Geirsdóttir hittum svo Ómar og Boga þar sem við vorum fyrst og fremst að ræða hvort að það væri þess virði að fara í viðræður eða ekki og ef slíkar viðræður ættu að fara fram með hvaða hætti það gæti verið. Það var ákveðið að fara ekki í slíkar viðræður og því fóru aldrei formlegar viðræður í gang og því bar hvorki Icelandair né okkur skylt að upplýsa markaðinn um það á þeim tíma enda engin ástæða til.
6. Aðkoma Samgöngustofu og annarra opinbera aðila. Það virðist hafa \"gleymst\" í þessari umræðu að við vorum með undirritaðan skilyrtan samning við Indigo Partners um allt að 9 milljarða fjárfestingu sem hefði tryggt framtíð WOW air um ókomna tíð. Við unnum mjög náið með Samgöngustofu og öðrum eftirlitsaðilum við að uppfylla skilyrði samningsins þar með talið að ná samkomulagi við alla skuldabréfaeigendur okkar, sem við gerðum. Ná að endursemja og skila breiðþotunum, sem við gerðum. Við unnum því í góðri trú um að við værum að uppfylla öll skilyrði samningsins og myndum klára endanlegan samning eins og til stóð 28. febrúar 2019. Allt fram að þeim tíma vorum við öll sannfærð um að WOW air myndi lifa áfram. Því miður varð það ekki raunin.
Stefán Einar hefur áður borið fram alvarlegar ásakanir og rangfærslur í garð WOW air sem áttu ekki við rök að styðjast. Það er ástæðan fyrir því að ég hafði engan áhuga á að ræða við hann um félagið. Alvarlegast var þegar hann fullyrti að WOW air skuldaði Isavia 2 milljarða í stórri forsíðugrein sem Morgunblaðið birti 15. september 2018 þegar við vorum á loka metrunum við að klára umrætt skuldabréfaútboð. Núna liggja fyrir gögn sem sýna svo ekki verður um villst að skuld okkar við Isavia var nær einum milljarði á þessum tíma en ekki tveim milljörðum eins og Stefán Einar fullyrti. Þessi frétt og sú umræða sem skapaðist í framhaldinu hafði mjög neikvæð áhrfi á skuldabréfaútboðið og starfsemi WOW air.
Eins og ég hef ítrekað sagt skorast ég ekki undan ábyrgð minni í falli félagsins og klárlega vildi ég óska þess að við hefðum gert ýmislegt öðruvísi. Ég er sannfærður að það hefði verið hægt að bjarga WOW air og þeim miklu verðmætum sem þar lágu ekki síst fyrir þjóðarbúið og íslenska neytendur. Það líður vart sá klukkutími að ég hugsi ekki um WOW air, þann frábæra hóp starfsfólks sem gerði WOW að veruleika, farþega okkar og allt sem við vorum búin að byggja upp í sameiningu.
Sú saga verður einn daginn sögð.
