Miklar breytingar eru að verða í neytendahegðun fjölmiðlanotenda og birtist menningarmunurinn í miklum samdrætti í áhorfi á hefðbundna sjónvarpsdagskrá, sérstaklega hjá ungu fólki. Mikilvægt er að endurskoða þjónustuhlutverk RÚV í ljósi þessarar þróunar, segir í nýrri skýrslu sem kynnt hefur verið um Ríkisútvarpið.
Fréttastofa Rúv greinir frá efni skýrslunnar. Þar kemur fram að rekstur RÚV ohf. frá stofnun félagsins árið 2007 hafi aldrei verið sjálfbær. Gjöld hafi verið meiri en tekjur á tímabilinu í heild og hafi hallarekstur verið fjármagnaður með auknu ríkisframlagi, lántökum og frestun afborgana lána.
Eyþór Arnalds er formaður starfshóps sem lét gera skýrsluna til að skoða og greina rekstur Ríkisútvarpsins. Starfshópnum var falið að varpa ljósi á ástæður þess rekstrarvanda sem Ríkisútvarpið glímir við.
Í helstu niðurstöðum skýrslunnar segir að rekstrarkostnaður hafi verið að jafnaði 5,4 milljarðar á ári frá stofnun RÚV ohf. 2007 á föstu verðlagi. Á síðasta rekstrarári hafi heildarkostnaður verið 5,3 milljarðar króna. Að óbreyttu stefni í hækkun kostnaðar á næsta ári.
Einfaldur samanburður talna við hluta sjónvarps-og útvarpsrekstrar 365 miðla sýni að rekstrarkostnaður RÚV sé mun hærri.
Í skýrslunni segir ennfremur: „Frá stofnun RÚV ohf. hefur skuldsetning félagsins verið mikil. Á árunum 2012-2014 jukust vaxtaberandi skuldir RÚV hlutfallslega mest, eða um eina og hálfa milljón króna á dag að jafnaði. Nýverið tilkynnti RÚV um sölu, með ákveðnum fyrirvörum, á byggingarétti fyrir 1,5 ma.kr. sem gert er ráð fyrir að gangi til lækkunar skulda. Fjármagnsgjöld RÚV hafa undanfarin ár verið um 6% af heildargjöldum.“
Heimildarmenn Hringbrautar, starfsmenn Ríkisútvarpsins, segja augljóst að kné muni fylgja kviði. Starfsmenn búi sig undir breytingar í kjölfar útgáfu skýrslunnar. Einn fréttamanna Rúv hafði á orði að mönnum sviði samanburður við 365 vegna gjörólíks hlutverks almannaútvarps og fjölmiðla í einkaeigu.
