Um fátt er meira rætt á samfélagsmiðlum þessa dagana en vinnubrögð fjölmiðla vegna ýmissa umdeildra frétta sem sagðar hafa verið undanfarið. Það er þó ekki síst hið svokallaða Melaskólamál sem er milli tanna fólks. Margvísleg gagnrýni hefur komið fram á efnistök fjölmiðla í því máli.
Á visir.is má lesa úttekt Fréttablaðsins þar sem fjallað um að þrjátíu kennarar Melaskóla hafi hótað uppsögn við skólann ef skólastjórinn, Dagný Annasdóttir, kemur aftur til starfa í lok mars eftir veikindaleyfi. Þar er vitnað til þess að Stundin hafi birt nafnlaust viðtal við kennara í Melaskóla sem sagði Dagnýju leggja kennara í einelti og stjórna með harðri hendi. Engin sértæk dæmi hafi þó verið tínd til. Dagný vill ekki tjá sig um málið í fjölmiðlum og ber við hagsmunum skólastarfs.
Fréttablaðið rifjar upp að í fimm áratugi, frá árinu 1959 til 2013, hafi innanhúsmaður tekiðvið stöðu skólastjóra í Melaskóla en fyrir þremur árum hafi sú hefð verið brotin þegar Dagný var ráðin skólastjóri en sextán sóttu um stöðuna, þar á meðal starfandi aðstoðarskólastjóri Melaskóla.
Fréttablaðið hefur eftir kennara við skólann, nafnlaust, að Dagný hafi aldrei fengið tækifæri innan veggja skólans, hún hafi strax mætt mikilli andúð. Kennararæði sé í skólanum og fólk alls ekki tilbúið að taka stjórn. „Því hafi tilburðir Dagnýjar til að taka stjórnina fallið í grýttan jarðveg. Hún hafi þurft að fara í erfiðar aðgerðir, niðurskurð og fylgja kjarasamningum, en uppskorið persónulega óvild í sinn garð.“
Guðlaug Erla Gunnarsdóttir, formaður Skólastjórafélags Reykjavíkur, fordæmir einhliða umfjöllun fjölmiðla síðustu daga.
„Mér finnst þetta óvægið og fjölmiðlar eiga ekki að vinna svona. Þetta snýst um manneskju og þetta eru alvarlegar ásakanir. Þessi einhliða umfjöllun hefur áhrif á traust til skólans og getur skaðað starfsemina,“ segir hún í Fréttablaðinu.
Þolir ekki nornabrennur
Undir þessi sjónarmið hafa ýmsir tekið á félagsmiðlum þótt deilt sé um ábyrgð fjölmiðla.
„Ef það er eitthvað sem ég þoli ekki í íslensku samfélagi þá eru það nornabrennur,“ skrifar Rúnar Helgi Vignisson háskólakennari, rithöfundur og þýðandi og deilir frétt Fréttablaðsins.
„Þessi hlið Melaskólamálsins hefði átt að koma strax fram. Svei ykkur, Vesturbæingar, fyrir þennan framgangsmáta og svei ykkur, fjölmiðlar, fyrir einhliða fréttaflutning framan af. Það á ekki að drepa fólk fyrst og reyna svo að blása lífi í það.“
Guðrún Karls Helgudóttur prestur birtir einnig ádrepu á facebook:
„Einhliða umfjöllun fjölmiðla um viðkvæm málefni sem oft á tíðum snerta mikið af fólki (börn og aðstandendur þeirra sem fjallað er um) hefur verið að aukast finnst mér á kostnað vandaðrar blaðamennsku þar sem fleiri hliðar eru kannaðar og gengið úr skugga um sannleiksgildi eins og hæt er,“ er meðal þess sem sóknarpresturinn skrifar.
Hver sem er virðist geta fengið umfjöllun um persónuleg mál og ásakanir í garð nafngreindra einstaklinga sem mannorð \"óvinarins\" er dregið niður í svaðið án tillits til aðstandenda og þess að sá eða sú sem fjallað er um getur oft ekki borið hönd fyrir höfuð sér nema með því að rekja málið í fjölmiðlum. Það hafa bara ekki allir áhuga á því.
Þetta hefur rýrt gildi nokkurra fjölmiðla mikið. Sannleikurinn í samskiptum fólks er sjaldan einn og yfirleitt er ein manneskja ekki eigandi sannleikans. Hliðarnar eru yfirleitt jafn margar og fólkið sem á í hlut og nið rétta einhver blanda þarna á milli.
Þetta á þó ekki við um alla fjölmiðla því sumir eru sannarlega að reyna að vanda sig og best að halda sig bara við þá,“ skrifar Guðrún prestur.
