„Fyrst og fremst er þörf á að rýna í þessar niðurstöður enn frekar til að hægt sé að bregðast við með bæði almennum og sértækum aðgerðum. Við fyrstu sýn eru t.d. ungir foreldrar með eitt barn sá hópur þar sem börn þeirra búa við vaxandi skort og í þetta þarf að rýna frekar,“ segir Bjarkey Olsen Gunnarsdóttir, þingmaður VG um nýja skýrslu UNICEF um skort og fátækt á Íslandi.
Í skýrslunni kemur fram að gera megi ráð fyrir að rúmlega 6.100 börn á aldrinum 1-15 ára líði efnislegan skort hér á landi. Þar af líði tæplega 1.600 börn verulegan skort. Börn teljast líða skort ef þau skortir tvennt eða fleira af því sem spurt var um í lífskjararannsókn sem fram fór á alþjóðavísu. Greining UNICEF leiðir í ljós að 9,1% allra barna á Íslandi liðu skort árið 2014, samanborið við 4,0% barna árið 2009. Fjöldi barna sem líður skort hefur því rúmlega tvöfaldast á tímabilinu og fólk á leigumarkaði er oft í mikil vanda.
Helst liðu börn á Íslandi skort árið 2014 hvað varðar húsnæði og félagslíf. Mesta aukningin í prósentustigum er á sviði húsnæðis, afþreyingar og félagslífs. Einungis á sviði upplýsinga og næringar hefur skorturinn minnkað.
Þröngbýli er oftast ástæða þess að barn telst líða skort á þessu sviði. Sé hlutfall barna sem líða skort yfirfært á heildarfjölda barna á Íslandi 1-15 ára kemur sömuleiðis í ljós að gera má ráð fyrir að í kringum 3.400 börn líði skort hvað varðar félagslíf.
„Algengasta ástæðan er sú að barnið getur ekki boðið vinum sínum heim til að borða eða leika við. Litlu færri börn líða skort á sviði klæðnaðar en félagslífs. Algengasta orsökin er sú að barnið á ekki tvenn pör af skóm sem passa. Að sama skapi líða í kringum 3.200 börn skort á sviði afþreyingar. Þau eiga til dæmis ekki leiktæki, leikföng eða íþróttabúnað til að vera með utandyra og/eða ekki bækur sem henta aldri,“ segir í skýrslunni og þykja niðurstöður hennar sláandi.
„Mér þykir mikilvægt að Hagstofan fái fjármuni til að gera svona greiningar helst árlega til að fylgja eftir þessum hópi og sjá hvernig þróunin verður áfram. Þetta eru ólík ár, 2009 og 2014 og tekið fram að samanburðurinn sé ekki nægjanlegur, en allur skortur barna í samfélagi sem telst ríkt á ekki að líðast og ljóst að velferð barna í dag hefur áhrif á framtíð þeirra og þátttöku síðar meir á vinnumarkaði og almennt í samfélaginu,“ segir Bjarkey Olsen þingmaður sem fyrst nokkurra þingmanna hefur brugðist við fyrirspurn Hringbrautar vegna skýrslunnar sem lesa má í heild hér.
