Ekki er útlit fyrir að skólum í Reykjavík og næstu nágrannasveitarfélögum verði lokað í dag vegna bylsins sem nú ríður yfir landið, en þéttur skafrenningur lagðist yfir byggðina suðvestanlands á níunda tímanum í morgun.
Aðra sögu er að segja af skólahaldi á Vesturlandi, en þar liggur skólastarfi víða niðri af völdum veðurs.
Umferð er nú með minnsta á höfuðborgarsvæðinu og ljóst að fjölmargir hafa tekið mark á aðvörunum Almannavarna ríkisins sem sögðu í gær að ekkert ferðaveður yrði þegar liði á morguninn. Það virðist og vera að ganga eftir.
Lögregla vill ítreka fyrir fólki að vera ekki á ferðinni nema á ökutækjum sem útbúin eru fyrir vetrarfærð.
