\"Frumvarpið markast af bættum aðstæðum í íslensku efnahagslífi, en áætlaðar skatttekjur aukast um 45 ma. kr. sem jafngildir um 6% hækkun á milli ára. Skortur á aðhaldi þegar kemur að launakostnaði veldur áhyggjum en tímabærar skattalækkanir eru fagnaðarefni.\"
Þetta er dómur Viðskiptaráðs Íslands yfir nýju fjárlagafrumvarpi stjórnvalda, en ráðið telur ríkisstjórn Sigmundar Davíðs Gunnlaugssonar seilast um of í vasa fólks og fyrirtækja, fyrir nú utan hitt, sem verði einnig að teljast alvarlegt, en það er útgjaldaþenslan: \"Þrátt fyrir brýna þörf er ekki gert ráð fyrir áframhaldandi aðhaldi í rekstri heldur vaxa útgjöld umtalsvert á milli ára. Það má fyrst og fremst rekja til hærri launakostnaðar. Launaútgjöld hækka um 15 ma. kr. á milli ára, sem jafngildir um 10% aukningu. Þar gætir áhrifa þeirra kjarasamninga sem gerðir hafa verið við fjölmenna hópa opinberra starfsmanna. Vegna mikilla hækkana í þeim samningum er fyrirséð að þessi kostnaður muni aukast enn frekar á næstu árum. Hætt er við því að það ýti undir þenslu á komandi misserum,\" segir í tilkynningu ráðsins í dag.
Viðskiptaráð fagnar því að stjórnvöld skili hluta tekjuaukans í formi skattalækkana og telur afnám tolla á allar vörur nema matvörur sérstakt gleðiefni, en segir þó ljóst að ganga hefði átt lengra við lækkun skatta: \"Skattalækkanir nema einungis um fjórðungi af aukningi skatttekna ríkissjóðs á milli ára. Sérstök vonbrigði eru að tryggingagjöld hafi ekki lækkað í ljósi þess að atvinnuleysi hefur lækkað verulega á undanförnum misserum. Þá myndi lækkun tryggingagjalda einnig vinna gegn verðbólguáhrifum nýlegra kjarasamninga. Auk þess hefði mátt lækka fjármagnstekjuskatt, en vaxandi verðbólga á næstu árum mun leiða til aukinnar skattheimtu á sparnað með neikvæðum afleiðingum fyrir fjárfestingu,\" segja forkólfar Viðskiptaráðs í dag.
