Meginþorri fólks í Skandinavíu er sáttur við að borga háa skatta því hann ber meira úr bítum úr velferðarkerfinu í gegnum lífið. Þetta sagði Sigurður Ólafsson stjórnmálafræðingur og verkefnastjóri Norðurlanda í fókus í fréttaskýringaþættinum Heimsljósi í gærkvöldi þar sem fjallað var um dönsku kosningarnar.
Sigurður tók sem dæmi námsfólk sem hefði lítið milli handanna meðan á námi stæði, en það nyti námslauna í stað námslána, hefði aðgang að góðum almenningssamgöngum og ókeypis leikskólavist fyrir börnin sín. Til að byrja með sé fólk kannski frekar þiggjandi í kerfinu, en þegar lengra dragi og fólk fari að borga háa skatta sem eru tekjutengdir sé það sáttara við að greiða inni í kerfið því það sjái hvað það fái á móti. Það sé alls ekki hægt að ætlast til þess sama af félagslega kerfinu hér, því hér séu skattar lægri og því hægt að krefjast minna af því.
Hrannar B. Arnarson framkvlmdastjóri jafnaðarmanna í Norðurlandaráði var sessunautur Sigurðar í þættinum, en hann sagði að hefði molnað úr norræna velferðarkerfinu í stjórnartíð hægri flokkanna í Svíþjóð og það væri ekki lengur svipur hjá sjón. Það stefndi í það sama á hinum Norðurlöndunum, og ef ekkert verði að gert muni velferðarkerfið verða sambærilegt við félagslega kerfið á Ítalíu innan 20 ára. Það sé áhyggjuefni, nú þegar norræna módelið sé mært víða um heim sem besta samfélagskerfið þar sem mestur jöfnuður ríki.
Hrannar segir það einnig hafa komið honum mikið á óvart í starfi sínu hve samráð milli stjórnar og stjórnarandstöðu er víðtækt á hinum Norðurlöndunum og mikið upp úr því lagt að miðla málum í nefndum áður en þau eru lögð fyrir þjóðþingin. Átakapólitíkin sem einkenni íslensk stjórnmál séu fáheyrð annarsstaðar en á Alþingi.
