Gísli Gíslason, hafnarstjóri Faxaflóahafnar segir að sjávarstrætó geti verið mjög sniðug lausn til að skoða, enda séu slíkir samgöngumátar þekktir víða erlendis, en Gísli var meðal gesta í þættinum Ég bara spyr, sem sýndur var á Hringbraut í gærkvöld.
Gísli svaraði spurningu frá lesanda á upplýsingaveitunni Spyr.is á dögunum, þar sem spurt var hvort Íslendingum væri leyfilegt að búa í húsbátum. Gísli sagði ekki leyfilegt að skrá lögheimili í báta, en tímabundin viðvera í bátum væri vel möguleg. Fyrir slíka viðlegu eru greiddar um 10 til 12 þúsund krónur á mánuði, auk rafmagns sem notað er.
Í þættinum er Gísli spurður hvernig honum lítist á að fólk nýti sér sjávarleiðina til að komast á milli staða eins og Grafarvogs og til vinnu í miðbæ. Gísli segist mjög hrifinn af slíkum tilraunum og þær sé verðugt að skoða og þróa áfram.
Þátturinn Ég bara spyr er í umsjá Rakelar Sveinsdóttur. Hann byggir á fyrirspurnum almennings og svörum sem birt eru á upplýsingaveitunni Spyr.is. Áhorfendur Hringbrautar eru hvattir til að taka þátt í umræðum þáttarins, með því að senda inn spurningar til Spyr.is. Valið er úr svörum í hverri viku til að ræða nánar í Ég bara spyr á Hringbraut.
