„Ég vil fá að vita hvað menn ætla að fá úr 60 milljarða eyðslu á næstu árum í samdrætti losun,“ sagði Sigríður Andersen, fyrrverandi þingmaður og ráðherra, í Bítinu á Bylgjunni í morgun. Hún er aldeilis ekki hætt afskiptum af stjórnmálum þrátt fyrir að hafa hætt á þingi og gagnrýnir stjórnvöld harðlega þegar kemur að losun gróðurhúsalofttegunda.
Sigríður segir að ríkið hafi ekki hugmynd um hve mikið, eða hvort, losun koltvísýrings minnkar vegna margra milljarða króna sem það veitir árlega í skattaívilnanir til lífeldsneytis og rafbíla.
„Samt sem áður erum við að eyða í þetta allt í allt 2,4 milljarða á ári. Svo eru undanþágur, til dæmis fyrir rafbíla, 5 milljarðar á ári,“ sagði hún.
„Höfum svo í huga að við vitum að það er meira kolefnisspor sem fylgir rafbílum. Framleiðslunni. Svo segir að það sé ekki vitað hversu mikið það er, þess vegna treysta stjórnvöld sér ekki til að reikna fyrir mig hversu mikill samdrátturinn er.“
Hún vitnar svo í fyrirspurn sinnar til Guðmundar Inga Guðbrandssonar umhverfisráðherra frá síðasta vetri: „Hvað ætlar þú að fá mikinn samdrátt í losun fyrir þennan pening? Mér finnst það skipta mjög miklu máli þegar fjárveitingarvaldið er að dæla pening í þetta. Hann sagði bara: „Ég veit það ekki. Við erum að skoða þetta í ráðuneytinu.“ Auðvitað er þetta eitthvað sem menn eiga að vera búnir að leggja fyrir sig áður en farið er að eyða peningum. Mér finnst þetta ámælisvert að ana svona áfram af því að Ísland ber höfuð og herðar yfir aðrar þjóðir þegar kemur að notkun endurnýjanlegrar orku. 90 prósent versus 17 prósent í Evrópusambandinu,“ sagði Sigríður.
„Þar með er ekki sagt að ég vilji ekki að Ísland geri neitt í loftslagsmálum, þvert á móti. Við höfum svo margt fram að færa erlendis í þeim málum.“ Vísar hún svo í jarðhitaverkefni á erlendri grundu, reynsla okkar eigi að vera framlag Íslands til loftslagsmála.
