Sigmundur ræðst á kára: yfirgangur!

Sigmundur Ernir Rúnarsson skrifar

11. desember 2015 kl. 09:55

Fréttir & pistlar

Sigmundur Davíð Gunnlaugsson, forsætisráðherra vandar Kára Stefánssyni, forstjóra Íslenskrar erfðagreiningar ekki kveðjurnar í aðsendri grein í Fréttablaðinu í dag sem vakið hefur feiknamikla athygli, en þar uppnefnir ráðherrann Kára, segir hann alltaf reyna að toppa allt og alla.

Tilefni skrifa Sigmundar Davíðs er harðorð grein Kára í sama blaði í gær um það sem hann kallar aðför stjórnvalda að heilbrigðiskerfinu; þjóðinni ofbjóði skilningsleysi ráðamanna í þessum málaflokki og hann hyggist safna 100 þúsund undirskriftum gegn þessari einnota ríkisstjórn, en þar skrifi fólk sig fyrir því að kjósa aldrei aftur þessa niðurrifsflokka.

Forsætisráðherra sýður hveljur eins og sjá má af grein hans í dag, þar nefnir hann Kára aldrei á nafn, en uppnefnir hann toppara, segir hann vaða yfir allt og alla og kunna sér ekki hóf á mannamótum, vilji þar alltaf eiga sviðið svo öllum séu gáfur hans ljósar. Nú vilji hann enn eiga sviðið með ábyrgðarlausum málflutningi um eyðslusemi og lýðskrum. Í raun og sann standist málflutningur Kára ekki; núverandi stjórn hafi lagt áherslu á að leggja fé til spítalans. Þá er hann ósáttur við orð Kára um að losun fjármagnshafta skili 300 milljörðum en ekki 850 milljörðum í ríkissjóð. Sigmundur segir merkilegt ef maður sem fari svo frjálslega með tölur geti rekið stórt fyrirtæki.

\"Það sem topparar þrá umfram allt annað er athygli og því er ég eflaust að veita jákvæða styrkingu með því að svara slíkum manni. Hann mun sjálfsagt líta á það sem tækifæri til að útskýra að nú hafi sannast enn betur en áður hversu illa gefnir og illviljaðir stjórnmálamenn séu,“ segir Sigmundur í grein sinni. “Það er samt ekki hægt að láta það óátalið þegar maður sem talinn er gáfaður á sumum sviðum heldur fram hreinum ósannindum og nýtir um leið veikindi fólks til sjálfsupphafningar.“

Sigmundur Davíð segir framgöngu Kára ekki aðeins vera ranga og óheiðarlega heldur sé hún líka skaðleg. Það sé vegna þess að enn betri árangur þurfi að nást í heilbrigðismálum og til þess verði stjórnvöld að geta reitt sig á ráðgjöf þeirra sem best þekkja til: \"Galgopaháttur í bland við rangfærslur hjálpar ekki til við það og enn síður lausnir byggðar á ósannindum,“ skrifar Sigmundur Davíð næsta reiður í Fréttablaðið í dag.